ތ. ވޭމަންޑޫގެ ބިން ހިއްކުމުގެ މަޝްރޫއުގެ އަމަލީ މަސައްކަތް ފަށައިފި އެވެ.

އެ މަޝްރޫއުގެ މަސައްކަތް ހައުސިން މިނިސްޓްރީން ހަވާލުކޮށްފައި ވަނީ އެމްޓީސީސީ އާއިއެވެ. ހައުސިން މިނިސްޓްރީ އާއި އެމްޓީސީސީ އާ ދެމެދު މި މަޝްރޫއުގެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ސެޕްޓެމްބަރު މަހުގަ އެވެ. ނަމަވެސް ވޭމަންޑޫ ބިން ހިއްކުމުގެ އަމަލީ މަސައްކަތް ރަސްމީކޮށް ފެށިފައި ވަނީ އިއްޔެގަ އެވެ.

މި މަޝްރޫއުގެ ދަށުން ޖުމްލަ 27 ހެކްޓަރުގެ ބިން ހިއްކައި، ރަށަށް ދިމާވެފައިވާ ބިމުގެ ދަތިކަމަށް ދާއިމީ ހައްލެއް ހޯދައިދިނުމަށް ސަރުކާރުން ވަނީ ނިންމާފައެވެ.

އެގޮތުން ވޭމަންޑޫގެ ބިން ހިއްކުމުގެ މަސައްކަތް ކުރަމުންދަނީ "ފިލިޕޯ ބްރޫނެލެސްކީ"ނަމަކަށް ކިޔާ ޓްރެއިލިން ސަކްޝަން ހޮޕާ ޑްރެޖަރަކުންނެވެ. އަދި އެ ޑްރެޖަރަކީ 11،300 ކިއުބިކް މީޓަރުގެ ބިން ހިއްކުމުގެ ބޮޑެތި މަޝްރޫއުތަކަށް ހާއްސަކޮށް ފަރުމާ ކުރެވިފައިވާ ޒަމަނީ ވަސީލަތެކެވެ. އޭގެ އިތުރުން ވޭމަންޑޫ ބިންހިއްކުމުގެ މަޝްރޫއުގެ ތެރެއިން، ޒަމަނީ ބަނދަރެއް ތަރައްގީ ކުރުމުގެ މަސައްކަތް ވެސް އެމްޓީސީސީއަށް ވަނީ ހަވާލުކޮށްފަ އެވެ.

ރަށުގެ އާބާދީ ދުވަހެއް ދުވަހަކަށް އިތުރުވަމުންދިއުމާ ގުޅިގެން، ދިރިއުޅުމަށް ބިން ދިނުމުގެ ދަތިކަން ވޭމަންޑޫ ރައްޔިތުންނަށް ވަނީ ދިމާވެފައެވެ. އެކަމަށް ހައްލެއް ހޯދުމުގެ ގޮތުން ރައީސް މުއިއްޒުގެ ސަރުކާރުން ތައްޔާރު ކުރެވޭ ލޭންޑް ޔޫސް ޕްލޭންގެ ދަށުން، ހިއްކާ ބިމުން ގޯތި ދޫކުރުމާއި ހައުސިން ޔުނިޓްތަކަށް ބިން ހާއްސަ ކުރެވިގެންދާނެ އެވެ.