އައްޑޫ ސިޓީގައި ޑިޖިޓަލް ޕޭމަންޓް ސޮލިއުޝަން "ސްވައިޕް" ރަސްމީކޮށް ތައާރަފްކޮށްފިއެވެ.
މި ހިދުމަތް އައްޑޫއަށް ތައާރަފްކުރުމަށްޓަކައި ރޭ ހާއްސަ ރަސްމިއްޔާތެއް އައްޑޫ ސިޓީ ހިތަދޫ ސްކޫލްގައި ވަނީ ބާއްވައިފައެވެ.
މި ރަސްމިއްޔާތުގެ ޝަރަފުވެރި މެހްމާނަކީ މިނިސްޓާ އޮފް ހޯމްލޭންޑް ސެކިއުރިޓީ އެންޑް ޓެކްނޮލަޖީ އަލީ އިހްސާން އެވެ. މި ރަސްމިއްޔާތުގައި މިނިސްޓަރުގެ އިތުރުން ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ މުހައްމަދު ޝަރީފު ބައިވެރިވެވަޑައިގެން ވާހަކަފުޅު ދެއްކެވިއެވެ.
ސްވައިޕް އައްޑޫއަށް ތައާރަފްކުރިތާ މަދު ދުވަސްކޮޅެއްގެ ތެރޭގައި އެ ސިޓީގެ ވިޔަފާރިވެރިންގެ ފަރާތުން މި ހިދުމަތަށް ވަނީ ވަރަށް ބޮޑު ތަރުހީބެއް ލިބިފައެވެ. މިއާއެކު، އައްޑޫގެ ގާތްގަނޑަކަށް ހުރިހާ ވިޔަފާރިއަކުން މިހާރު ސްވައިޕް މެދުވެރިކޮށް ފައިސާ ބަލައިގަންނާނެ ކަމަށް ބީއެމްއެލް އިން މައުލޫމާތު ދެއެވެ.
ބީއެމްއެލްގެ ސީއީއޯ މުހައްމަދު ޝަރީފު ވިދާޅުވީ، އައްޑޫގެ ވިޔަފާރިވެރިން ސްވައިޕް ބަލައިގަތް އަވަސްމިނުން ފެނިގެންދަނީ އައްޑޫއަކީ ޒަމާނީ ޓެކްނޮލަޖީއަށް ހޭލުންތެރި ސިޓީއެއް ކަމަށެވެ.
ސްވައިޕަކީ ބީއެމްއެލް އިން ތައާރަފްކުރި, ރާއްޖެއާއި ރާއްޖެއިން ބޭރުގައި، އެއްވެސް ދަތިކަމެއް ނެތި، ރައްކާތެރިކަމާއެކު ވަގުތުން ފައިސާގެ މުއާމަލާތްތައް ހިންގޭނެ އައު މަލްޓި-ކަރަންސީ ޑިޖިޓަލް ވޮލެޓެކެވެ.
ސައްތައިންސައްތަ ދިވެހިންގެ އުފެއްދުމެއްގެ ގޮތުގައި ތަރައްގީކޮށްފައިވާ މި ޑިޖިޓަލް ވޮލެޓަކީ، ބައިނަލްއަގުވާމީ ފައިނޭންޝަލް ޓެކްނޮލޮޖީގެ މައިދާނުގައި ދިވެހިންގެ ހުނަރާއި ރާއްޖޭގެ ނަން ފާހަގަކޮށްދޭނެ އުފެއްދުމެކެވެ.
ސްވައިޕްގެ ހިދުމަތް ރަސްމީކޮށް ތައާރަފްކުރުމާއެކު، އައްޑޫ ސިޓީގެ ކުދި އަދި މެދުފަންތީގެ ވިޔަފާރިތަކަށް ފައިސާގެ މުއާމަލާތްތައް ހިންގުމުގައި ބޮޑެތި ލުއިފަސޭހަތަކެއް ލިބިގެންދާނެއެވެ.
