މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ރައީސާގެ މަގާމަށް ކުރިމަތިލައްވާފައިވާ ކެނޑިޑޭޓް އަލްއުސްތާޒާ އާޝިޔަތު އަލައިކާ އަދުނާން، ތަފާތު އަދި ޝައުޤުވެރި ކެންޕެއިން ހަރަކާތެއް ފައްޓަވައިފިއެވެ.
"އަލައިކާ އިނގޭތަ؟" މި ނަމުގައި ކުރިއަށްގެންދާ މި ހާއްސަ ކުއިޒް މުބާރާތަކީ، މާލޭ ސިޓީގެ އާއިލާތަކަށް ޚާއްސަކޮށްގެން، ނަމަވެސް މުޅި ރާއްޖެއަށް ހުޅުވާލައިގެން ކުރިއަށްގެންދާ ހަރަކާތެކެވެ. މި ކުއިޒް ކުރިއަށްދާނީ މި ހިނގާ މާޗް މަހުގެ 10 ވަނަ ދުވަހުން ފެށިގެން 29 މާޗުގެ ނިޔަލަށެވެ.
މި މުބާރާތުގެ ދަށުން ކޮންމެ ދުވަހަކުވެސް ކެނޑިޑޭޓް އަލައިކާއާ ގުޅޭ ހާއްސަ ސުވާލެއް www.alaika.com ވެބްސައިޓް މެދުވެރިކޮށް އާންމުކުރެވޭނެއެވެ. ސުވާލުގެ ޖަވާބު ފޮނުވަން ޖެހެނީވެސް ހަމަ އެ ވެބްސައިޓް މެދުވެރިކޮށެވެ. ކޮންމެ ދުވަހެއްގެވެސް ސުވާލަށް ޖަވާބު ފޮނުވުމުގެ އެންމެ ފަހު ވަގުތަކީ އެ ދުވަހެއްގެ ރޭގަނޑު 12:00 (00:00) އެވެ.
ދުވަހުގެ ނަސީބުވެރިޔާ ހޮވުމަށް ހަމަޖެހިފައިވަނީ، އެ ދުވަހެއްގެ ސުވާލަށް ރަނގަޅު ޖަވާބު ފޮނުވާ ފަރާތްތަކުގެ މެދުގައި ނެގޭ ގުރުއަތަކުންނެވެ. ގުރުއަތުން ހޮވޭ ފަރާތް ޖެހިގެން އަންނަ ދުވަހު ވެބްސައިޓުގައި އިއުލާނު ކުރެވޭނެއެވެ. އަދި ނަސީބުވެރިޔާއަށް އިނާމު ހަވާލުކުރުމަށްޓަކައި އަލައިކާ އަމިއްލަފުޅަށް އެ ފަރާތަކަށް ގުޅުއްވާނެއެވެ.
މުޅި ކުއިޒް ނިމުމުން، ހުރިހާ ސުވާލުތަކަށް ރަނގަޅު ޖަވާބު ފޮނުވާފައިވާ ފަރާތްތަކުގެ މެދުގައި ގުރުއަތެއް ނެގުމަށް ވަނީ ހަމަޖެހިފައެވެ. މި ގުރުއަތުން ހޮވޭ، މުޅި ކުއިޒްގެ އެއްވަނަ ނަސީބުވެރިޔާއަށް ވީއޭވީ (VAV) ޕްރައިވެޓް ލިމިޓެޑްގެ ފަރާތުން ހުށަހަޅާފައިވާ ވަރަށް ހާއްސަ އަދި ބޮޑު އިނާމެއް ލިބިގެންދާނެއެވެ.
މިއީ ކެނޑިޑޭޓަކާއި ރައްޔިތުންނާ ދެމެދު އޮންނަ ގުޅުން ބަދަހިކޮށް، މައުލޫމާތު ފޯރުކޮށްދިނުމަށް ރާއްޖޭގައި ފެށި އައު މޮޑެލްއެއްގެ ކެންޕެއިން ހަރަކާތެއްގެ ގޮތުގައި ފާހަގަކުރެވެއެވެ.
