މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން ދުނިޔޭގެ އެންމެ ބޮޑު ގޭސް އުފައްދާ މަރުކަޒު ބަންދުކޮށް، އީރާނުން މުހިންމު ކަނޑުގެ މަގެއް ބަންދުކުރުމާ ގުޅިގެން، އިނގިރޭސިވިލާތުގައި ރައްކާކުރެވިފައި ހުރި ގޭހުގެ މިންވަރު އެންމެ ދެ ދުވަހަށް ވާވަރަށް މަދުވެ، ގައުމަށް ހަކަތައިގެ ބޮޑު ތަދެއް ކުރިމަތިވެދާނެކަމުގެ ބިރު ބޮޑުވެއްޖެ އެވެ.

ނެޝަނަލް ގޭސްއިން ހާމަކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިދިޔަ އަހަރު އިނގިރޭސިވިލާތުގެ ގޭސް ރިޒާވްގައި 18,000 ގިގަވޮޓް އަވާ ހުރި ނަމަވެސް، މިހާރު އެ އަދަދު ވަނީ 6,700 ގިގަވޮޓް އަވާ އަށް ދަށަށް ގޮސްފަ އެވެ. މިއީ އެ ގައުމުގެ އާންމު ބޭނުންތަކަށް ބަލާއިރު އެންމެ 1.5 ދުވަހަށް ފުދޭނެ މިންވަރެކެވެ. މީގެ އިތުރުން ލިކުއިފައިޑް ނެޗުރަލް ގޭސް (އެލް.އެން.ޖީ) ވެސް ހުރީ ގާތްގަނޑަކަށް ހަމަ މި މިންވަރަށެވެ.

ޔޫރަޕްގެ އެހެން ގައުމުތަކާ އަޅާކިޔާއިރު އިނގިރޭސިވިލާތުގެ ހާލަތު މާ ނާޒުކެވެ. ޔޫރަޕްގެ ގިނަ ގައުމުތަކުގައި އެތައް ހަފުތާއަކަށް ފުދޭވަރަށް ގޭސް ރިޒާވް ހުރި ނަމަވެސް، އިނގިރޭސިވިލާތުން ގޭސް ރައްކާކުރާ ނިޒާމަށް ސަރުކާރުން ދެމުންދިޔަ ފަންޑިން މެދުކަނޑާލުމުގެ ސަބަބުން ކުރިން 12 ދުވަހަށް ހުންނަ ރިޒާވް މިހާރު ވަނީ ވަރަށް ބޮޑަށް ދަށްވެފަ އެވެ.

މި ހާލަތުގެ ނާޖާއިޒު ފައިދާ ވިޔަފާރިވެރިން ނަގަމުންދާކަން ފާހަގަކުރެވެ އެވެ. އިނގިރޭސިވިލާތުގައި ގޭސް ރައްކާކުރެވިފައި ނެތުމުން، ބޭރުން ގޭސް ގަތުމަށް މަޖުބޫރުވެފައިވާތީ، ޔޫރަޕްގެ އެހެން ގައުމުތަކަށްވުރެ ބޮޑު އަގު ދީގެން ގޭސް ގަންނަން ވަނީ ޖެހިފަ އެވެ. މީގެ ސަބަބުން މިހާރު އިނގިރޭސިވިލާތަކީ މުޅި ޔޫރަޕްގައިވެސް އެންމެ އަގުބޮޑުކޮށް ގޭސް ގަންނަ ގައުމެވެ.

ދުނިޔޭގެ ބާޒާރުގައި ހަކަތައިގެ އަގު އުފުލެން މެދުވެރިވި މައިގަނޑު ސަބަބަކީ، ދުނިޔޭގެ ތެލާއި ގޭހުގެ 20 އިންސައްތަ ދަތުރުކުރާ "ސްޓްރެއިޓް އޮފް ހޯރްމޫޒް" އީރާނުން ބަންދުކުރުމެވެ. އަދި އީރާނުގެ ހަމަލާތަކާ ގުޅިގެން ގަތަރުގެ "ރަސް ލައްފާން" ގޭސް މަރުކަޒުގެ މަސައްކަތްތައް މެދުކަނޑާލުމަކީވެސް މީގެ ސަބަބެކެވެ.

މާހިރުން އިންޒާރުދޭ ގޮތުގައި، މި ހަމަނުޖެހުންތައް ދިގުލައިގެން ގޮސްފިނަމަ ސާފުނުކުރާ ތެޔޮ ފީފާއެއްގެ އަގު 150 ޑޮލަރަށް އުފުލިގެންދާނެ އެވެ. މިހާރުވެސް ތެލުގެ އަގު ވަނީ 90 ޑޮލަރަށްވުރެ މައްޗަށް ގޮސްފަ އެވެ. ގޯލްޑްމަން ސެކްސްއިން ބުނާ ގޮތުގައި މެދުއިރުމަތިން ތެޔޮ ސަޕްލައިކުރުން ހުއްޓުމަކަށް އައުމަކީ ރަޝިޔާ-ޔޫކްރެއިން ހަނގުރާމައަށްވުރެ 17 ގުނަ ބޮޑު އަސަރެއް ކުރާނެ ކަމެކެވެ.

މި ހާލަތާ ގުޅިގެން އިނގިރޭސިވިލާތުގެ އާންމު ރައްޔިތުންނަށް ދިރިއުޅުމުގެ ހަރަދުތައް އިންތިހާއަށް ބޮޑުވެގެންދާނެ އެވެ. ހަކަތައިގެ އަގުގެ އިތުރުން، މޯގޭޖް ރޭޓްތަކާއި ކާބޯތަކެތީގެ އަގުތައް ވެސް އުފުލޭނެ ކަމަށް އިގްތިސާދީ މާހިރުން ލަފާކުރެ އެވެ.

މި ހަނގުރާމައިގެ ތެރޭގައި އިސްރާއީލުން ވަނީ އީރާނުގެ ތެޔޮ މަރުކަޒުތަކަށް ވަރުގަދަ ހަމަލާތަކެއް ދީފައެވެ. އަދި އެމެރިކާގެ ރައީސް ޑޮނަލްޑް ޓްރަމްޕް ވަނީ މި ހަނގުރާމައިގައި އިނގިރޭސިވިލާތުން ބައިވެރިވުމަށް ތައްޔާރުވަމުންދާތީ އެ ގައުމުގެ ބޮޑުވަޒީރު ކީރް ސްޓާމަރަށް ވަރަށް ބޮޑަށް ފާޑުވިދާޅުވެފަ އެވެ. މިގޮތުން، ހަނގުރާމައަކުން ކާމިޔާބު ހޯދާފައިވަނިކޮށް، ފަހުން އެ ހަނގުރާމައަކާ ގުޅޭ ބަޔަކު ބޭނުންނުވާކަމަށް ވިދާޅުވެ އޭނާ ވަނީ ބަހުގެ ހަމަލާއެއް ސްޓާމަރަށް ފޮނުވާފަ އެވެ.