އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކާ ގުޅިގެން، އީރާނުގެ ވެރިކަން ބަދަލުކުރުމަށް ކުރާ އެއްވެސް މަސައްކަތަކަށް އެ ގައުމުގެ ރައްޔިތުންގެ ތާއީދެއް ނެތް ކަމަށް ބުނެ ޗައިނާއިން ވަރުގަދަ އިންޒާރެއް ދީފި އެވެ.

ޗައިނާގެ ފޮރިން މިނިސްޓަރު ވަންގް ޔީ ބީޖިންގްގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، އީރާނުގައި "ކަލާ ރިވޮލިއުޝަނެއް" ގެނައުމަށް ނުވަތަ ރޭވުންތެރިކަމާއެކު ވެރިކަން ބަދަލުކުރުމަށް ކުރާ މަސައްކަތްތަކަށް އާންމުންގެ ތާއީދެއް ނުލިބޭނެ ކަމަށެވެ. އަދި އީރާނުގެ އިތުރުން ހުރިހާ ގައުމެއްގެ އިސްތިގުލާލަށް އިހުތިރާމް ކުރުމަށް އޭނާ ގޮވާލެއްވި އެވެ.

މެދުއިރުމަތީގައި ހިނގަމުންދާ ހަމަނުޖެހުންތައް އިތުރަށް ފެތުރިގެން ދިޔަ ނުދިނުމަށްޓަކައި، މިހާރު ކުރިއަށްދާ އަސްކަރީ ހަރަކާތްތައް ވަގުތުން ހުއްޓާލުމަށް ގޮވާލާ، ވަންގް ޔީ އިތުރަށް ވިދާޅުވީ، މިއީ ހިނގައިގެންވާނެ ހަނގުރާމައެއް ނޫން ކަމަށާއި، މި ހަނގުރާމައިން އެއްވެސް ފަރާތަކަށް ފައިދާއެއް ނުކުރާނެ ކަމަށެވެ. "ބާރުގެ ބޭނުންކުރުމަކީ އެއްވެސް ހައްލެއް ނޫން. ހަތިޔާރުގެ ކުރިމަތިލުންތަކުގެ ސަބަބުން ނަފުރަތު އިތުރުވެ، އާ މައްސަލަތައް އުފެދުން ނޫން ކަމެއް ނުވާނެ،" އޭނާ ވިދާޅުވި އެވެ.

މެދުއިރުމަތީގެ ކަންކަން ނިންމުމުގެ ފުރިހަމަ އިހްތިޔާރު އޮންނަންވާނީ އެ ސަރަހައްދުގެ ގައުމުތަކަށް ކަމަށާއި، އެހެން ގައުމުތަކުގެ ދާހީލީ ކަންކަމާ ބެހިގެން ނުވާނެ ކަމަށް ޗައިނާގެ ފޮރިން މިނިސްޓަރު ވިދާޅުވި އެވެ. އަދި ދުނިޔެއަކީ ޖަންގަލީގެ އުސޫލުތަކަށް ތަބާވާ ތަނަކަށް ވެގެން ނުވާނެ ކަމަށާއި، ހުރިހާ ފަރާތްތަކުން ވެސް ވާހަކަދައްކައިގެން މައްސަލަތައް ހައްލުކުރުމަށް އޭނާ ބާރުއެޅުއްވި އެވެ.

މީގެ އިތުރުން، އީރާނުގެ ރޫހާނީ މާލިމީ އާޔަތުﷲ އަލީ ޚާމަނާއީ އަވަހާރަކޮށްލި ކޮށްލުން ޗައިނާއިން ވަނީ ކުށްވެރިކޮށްފައެވެ. އަދި ރަޝިޔާއާއެކު އޮތް ގުޅުމަކީ ގުޑުމެއް ނެތް ވަރުގަދަ ގުޅުމެއްގެ ގޮތުގައި ވަންގް ޔީ ސިފަކުރެއްވި އެވެ.

އެމެރިކާގެ ނޭޝަނަލް އިންޓެލިޖެންސް ކައުންސިލްގެ ސިއްރު ރިޕޯޓަކާ ހަވާލާދީ "ދަ ވޮޝިންގޓަން ޕޯސްޓް" އިން ރިޕޯޓްކޮށްފައިވާ ގޮތުގައި، އެމެރިކާއިން ބޮޑު އަސްކަރީ ހަމަލާއެއް ދިން ނަމަވެސް، އީރާނުގެ އަސްކަރީ އަދި ދީނީ ބާރުވެރިކަން ވައްޓާލެވުމަކީ ދުރު ކަމެކެވެ. މިއީ އީރާނުގެ ވެރިކަން ބަދަލުކުރެވޭނެ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް ދައްކަވާ ވާހަކަތަކާ ދެކޮޅު ރިޕޯޓެކެވެ.

ޗައިނާއިން ބުނީ މެދުއިރުމަތީގައި ހަމަޖެހުން ގާއިމުކޮށް، ދުނިޔޭގެ ސުލްހައަށްޓަކައި އެ ސަރަހައްދުގެ ގައުމުތަކާއެކު މަސައްކަތް ކުރުމަށް ތައްޔާރަށް އޮތް ކަމަށެވެ.