ދުނިޔޭގެ އެންމެ ބޮޑު ފަތުރުވެރިކަމުގެ މައުރަޒު ކަމަށްވާ އައިޓީބީ ބާލިން 2027 ހޯސްޓުކުރާ ގުއުމަކަށް ރާއްޖެ ކަނޑައަޅައި އެއްބަސްވުމުވައި ސޮއި ކޮށްފިއެވެ. އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ވިޒިޓް މޯލްޑިވްސްގެ މެނޭޖިން ޑައިރެކްޓަރު އިބްރާހިމް ޝިއުރީ އެވެ. އަދި މެސޭ ބާލިންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ޑރ. މާރިއޯ ޓޯބިއަސް އެވެ.

ވިޒިޓް މޯލްޑިވްސުން މިކަން ސިފަ ކުރަނީ ދުނިޔޭގެ މާކެޓުގައި ރާއްޖެ އިޝްތިހާރު ކުރުމަށް ލިބުނު ރަނުގެ ފުރުސަތެއްގެ ގޮތަށެވެ. އެ ކޯޕަރޭޝަނުން ބުނީ މައުރަޒުގެ ރަސްމީ ބްރޭންޑިންގެ ތެރެއިން ދިވެހިންގެ މެހެމާންދާރީ އާއި ރާއްޖޭގެ ފަތުރުވެރިކަމުގެ ސިނާއަތުގެ މުއްސަނދިކަން، މުޅި ދުނިޔެއަށް ދައްކާލެވޭނެ ކަމަށެވެ.

މި ރަސްމިއްޔާތުގައި ވާހަކަދައްކަވަމުން މެސޭ ބާލިންގެ ސީއީއޯ ޑރ. މާރިއޯ ޓޯބިއަސް ވިދާޅުވީ، އައިޓީބީ ބާލިންއަކީ ރާއްޖޭގެ ހިތްގައިމު ގުދުރަތީ ރީތިކަމުގެ އިތުރުން, ހަލުވިކަމާއެކު ކުރިއަރަމުން އަންނަ ފަތުރުވެރިކަން ބައިނަލްއަގުވާމީ މައިދާނުގައި އިޝްތިހާރު ކުރުމަށް ލިބޭނެ އެންމެ ރަނގަޅު ޕްލެޓްފޯމް ކަމަށެވެ.

އައިޓީބީ ބާލިންގެ ހޯސްޓް ކުރުމުގެ ފުރުސަތު ރާއްޖެއަށް ލިބުމަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ފަތުރުވެރިކަން ކުރިއެރުވުމަށް ގެންގުޅުއްވާ ސިޔާސަތުގެ ދަށުން، ދުނިޔޭގެ މާކެޓުގައި ރާއްޖޭގެ މަގުބޫލުކަން އިތުރުވާނެ ކަމެކެވެ.

މީގެ ކުރިން 2016 ވަނަ އަހަރު ވެސް ރާއްޖެއިން ވަނީ އައިޓީބީ ބާލިންގެ ހޯސްޓް ކަންޓްރީގެ ޝަރަފު ހޯދާފައެވެ. އެހެންކަމުން މީއީ ރާއްޖޭން އެ މައުރަޒު ހޮސްޓުކުރާ ދެ ވަނަ ފަހަރެވެ.