ދިވެހިންގެ ތެރޭގައި އާއި މުޅި ދުނިޔޭގެ އެންމެ މަގުބޫލު އެޕަލުން، މިހާތަނަށް ބާޒާރަށް ނެރުނު އެންމެ އަގުހެޔޮ ލެޕްޓޮޕް "މެކްބުކް ނިއޯ" ތައާރަފްކޮށްފިއެވެ.
އެއީ ވޭތުވެދިޔަ 10 އަހަރުގެ ތެރޭގައި އެޕަލުން ބާޒާރަށް ނެރުނު ފުރަތަމަ ބަޖެޓް މެކް އެވެ. އެޕަލުން އެންމެ އަގުހެޔޮކޮށް މެކްބުކެއް ވިއްކަމުން އައީ 999 ޑޮލަރަށެވެ. ނަމަވެސް އަލަށް ތައާރަފްކުރި "މެކްބުކް ނިއޯ" އާއެކު އެ އަގު ވަނީ 599 ޑޮލަރަށް ތިރިކޮށްފައެވެ.
ތަފާތު ރީތި ކުލަތަކެއްގައި ލިބެން ހުންނަ އެ ލެޕްޓޮޕަކީ އައިފޯން ގްރޭޑްގެ ޗިޕް ބޭނުންކޮށްގެން އުފައްދާފައިވާ، އުފުލައިގެން އުޅެން ފަސޭހަ ލުއި އުފެއްދުމެކެވެ. އަދި އެ އުފެއްދުމަކީ އަލަށް ލެޕްޓޮޕް ގަންނަ ފަރާތްތަކަށް އަމާޒުކޮށްގެން ނެރޭ އެންޓްރީ ލެވަލްގެ ވިންޑޯޒް ލެޕްޓޮޕްތަކަށް ދިން ބޮޑު ގޮންޖެހުމެއްގެ ގޮތުގައި މާހިރުން ސިފަކުރެއެވެ. އެޕަލުން ބުނީ އެ މެކްބުކަކީ ކްލާސްރޫމްތަކުގައި ބޭނުންކުރުމަށް ވަރަށް އެކަށީގެންވާ ލެޕްޓޮޕެއް ކަމަށެވެ.
ހަމައެއާއެކު މެކްބުކް ނިއޯގެ އިތުރުން، އެޕަލުން ވަނީ އައިފޯން 17 ގެ އަގުހެޔޮ ވާޝަނެއް ކަމަށްވާ "17އީ" އާއި، އާ އައިޕެޑް އެއާގެ އިތުރުން މެކްބުކް ޕްރޯގެ މުޅި ލައިން އެއްކޮށް އާކޮށް ބާޒާރަށް ނެރެފައެވެ.
އެހެންކަމުން އާ އުފެއްދުންތަކާއެކު އެޕަލްގެ އަމާޒަކީ އެ ކުންފުނީގެ އުފެއްދުންތައް ބޭނުންކުރާ މީހުންގެ އަދަދު އިތުރުކޮށް، އަގުހެޔޮކޮށް ފެންވަރު ރަނގަޅު ޓެކްނޮލޮޖީ އާންމުންނާ ހަމައަށް ފޯރުކޮށްދިނުމެވެ. އެޕަލުން ބުނާ ގޮތުގައި މެކްބުކް ނިއޯ އަކީ ބާޒާރުގައި މިހާރު ހުރި މިފަދަ އެހެން އުފެއްދުންތަކާ އަޅާބަލާއިރު ކުރުލަ ރީތި، ބާރުގަދަ އަދި ޖީބަށް ލުއި އުފެއްދުމަކަށް ވާނެއެވެ.
