"އާއިލީ ބޯހިޔާވަހިކަން" ޕްރޮގްރާމުގެ ދަށުން ދޫކުރާ ފްލެޓްތަކަށް ކުރިމަތިލާއިރު، އެ އިދާރާއެއްގައި މަސައްކަތްކުރި މުއްދަތު އެއް އަހަރަށް ކުޑަކުރަން ނިންމި ނިންމުން ބަދަލުކޮށް، އަނެއްކާވެސް އެ މުއްދަތު ފަސް އަހަރަށް ބަދަލުކުރަން ހައުސިން މިނިސްޓްރީން ނިންމައިފި އެވެ.
މިނިސްޓްރީން މި ބަދަލު ގެންނަން ނިންމީ އެއީ ސިޔާސީ މުވައްޒަފުންނަށް ފްލެޓް ދިނުމަށް ގެނައި ބަދަލެއް ކަމަށް ބުނެ ފެތުރެމުންދާ ވާހަކަތަކާ ގުޅިގެންނެވެ.
މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ، އުސޫލު ކުރިން އޮތްގޮތުންވެސް އަދި ފަހުން ގެނައި ބަދަލާ އެކު ވެސް ސިޔާސީ މުވައްޒަފުންނަށް ފްލެޓަށް ކުރިމަތިނުލެވޭނެ ކަމަށެވެ.
"ސަރުކާރުގެ އެއްވެސް ވިސްނުމެއް ނެތް ސިޔާސީ ގޮތުން ވަކި ބަޔަކަށް، އާންމުކޮށް އެ އޮންނަ ކެޓަގަރީގެ ބޭރުން ހާއްސަ ކެޓަގަރީއެއް ހަދައިގެން ކުރިމަތިލެވޭ ގޮތަށް ބޭއްވުމަކީ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި ވަޒީފާގައި އުޅޭ މުއްދަތު އެއް އަހަރަށް ކުޑަކުރަން ކުރިން ނިންމީ، އެކި އިދާރާތަކުގައި މަސައްކަތްކުރާ ގާބިލު މުވައްޒަފުން އެ ތަންތަނުގައި ދިގު މުއްދަތަކަށް ބޭތިއްބުމުގެ މަގުސަދުގައެވެ. މިސާލެއްގެ ގޮތުން މިނިސްޓަރު ވިދާޅުވީ، އެކި އިދާރާތަކަށް ވަޒީފާ ބަދަލުކުރާ ފަންނީ މުވައްޒަފުންނަށް މިހާރު އޮންނަ އުސޫލުގެ ދަށުން ފުރުސަތު ގެއްލޭ ކަމަށެވެ.
މި ޕްރޮގްރާމުގެ ދަށުން ޖުޑިޝަރީ، ފުލުހުން، އެމްއެންޑީއެފް، ސިވިލް ސާވިސް، ކަރެކްޝަންސް އަދި ރައީސް އޮފީސް ހިމެނޭ ގޮތަށް ޖުމްލަ 23 އިދާރާއަކަށް 1،000 ފްލެޓް ވަނީ ހާއްސަކޮށްފައެވެ. މި ކެޓަގަރީތަކުން ފްލެޓަށް ކުރިމަތިލާ ފަރާތްތަކުން ބޯހިޔާވަހިކަން ހަވާލުކުރާ ތާރީހުން ފެށިގެން، އެ އިދާރާއަކުން ކަނޑައަޅާ ވަކި މުއްދަތަކަށް ވަޒީފާގައި ދެމިތިބުމަށް އެއްބަސްވާން ޖެހެއެވެ.
މިނިސްޓަރުގެ އިއުލާނާ އެކު، ކުރިން އެއް އަހަރުގެ މުއްދަތަށް ބަލައިގެން ކުރިމަތިލާން އޮތް އުސޫލު އުވި، އަނެއްކާވެސް ފަސް އަހަރުގެ މުއްދަތު ހަމަވާ މުވައްޒަފުންނަށް އިސްކަންދޭ ގޮތަށް އުސޫލު އިސްލާހު ކުރެވޭނެ އެވެ. މިއީ އާންމުންގެ މެދުގައި އުފެދިފައިވާ ކަންބޮޑުވުންތަކަށް ހައްލެއް ހޯދައިދިނުމަށް ނިންމި ނިންމުމެއް ކަމަށް މިނިސްޓްރީން ފާހަގަކުރެއެވެ.
