މަނީ ލޯންޑަރިން އާއި ޓެރަރިޒަމަށް ފައިނޭންސްކުރުން ހުއްޓުވުމުގެ މަސައްކަތްތައް ވިލަރެސްކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގައި ގާއިމުކޮށްފައިވާ ފައިނޭންޝަލް އިންޓެލިޖެންސް ޔުނިޓް (އެފް.އައި.ޔޫ) ގެ އިސްވެރިޔާގެ މަގާމަށް މުހައްމަދު އިޝާން މިއަދު އައްޔަންކުރައްވައިފި އެވެ.
މި މަގާމަށް އިޝާން އައްޔަންކުރައްވާފައިވަނީ އެފްއައިޔޫގެ އިސްވެރިޔާގެ މަގާމަށް ކުރިމަތިލުމަށް އެމް.އެމް.އޭގެ މުވައްޒަފުންގެ ތެރެއިން ހުޅުވާލުމުން، އެ މަގާމަށް ޝައުގުވެރިކަން ފާޅުކުރި ފަރާތްތަކާ އިންޓަވިއު ކުރުމަށްފަހުގަ އެވެ. އިޝާން މީގެ ކުރިން ހުންނެވީ އެމް.އެމް.އޭ ގެ ހެޑް އޮފް ފައިނޭންސްގެ މަގާމުގަ އެވެ.
އިޝާން އަކީ މާލީ ދާއިރާގައި ތައުލީމީ އަދި ތަޖުރިބާކާރު ޗާޓާޑް އެކައުންޓަންޓެކެވެ. އޭނާ އަކީ އިނގިރޭސިވިލާތުގެ ޗާޓާޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (ސީ.އައި.އެމ.އޭ) ގެ އެސޯސިއޭޓް މެންބަރެއްގެ އިތުރުން، އިންސްޓިޓިއުޓް އޮފް ޗާޓަރޑް އެކައުންޓަންޓްސް އޮފް ދަ މޯލްޑިވްސްގެ އެފިލިއޭޓް މެންބަރެއްވެސް މެ އެވެ.
2014 ވަނަ އަހަރު އެމް.އެމް.އޭ އާ ގުޅިވަޑައިގަތް އިޝާން ވަނީ އެ މުއައްސަސާގައި ވޭތުވެދިޔަ 10 އަހަރު ދުވަހުގެ ތެރޭގައި މުހިންމު މަގާމުތަކެއް ފުރުއްވާފަ އެވެ. އޭގެ ތެރޭގައި ހެޑް އޮފް ކޯޕަރޭޓް އެކައުންޓްސް ސެކްޝަނާއި، ހެޑް އޮފް ފައިނޭންޝަލް ކޮންޓްރޯލްސް ޑިވިޜަން ހިމެނެއެވެ. މި މަގާމުތަކުގައި އޭނާ ވަނީ މާލީ ކަންކަން ބެލެހެއްޓުމާއި މުއައްސަސާގެ އެތެރޭގެ ހިންގުމުގެ މުހިންމު ޒިންމާތަކެއް އުފުއްލަވާފަ އެވެ.
ފައިނޭންޝަލް އިންޓެލިޖެންސް ޔުނިޓަކީ މަނީ ލޯންޑަރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން އެމް.އެމް.އޭގައި ގާއިމުކޮށްފައިވާ މިނިވަން ޔުނިޓެކެވެ. ގާނޫނުގައިވާ ގޮތުން މި ޔުނިޓުގެ އިސްވެރިޔާ އައްޔަންކުރުމާއި ވަކިކުރުމުގެ ބާރު ލިބިގެންވަނީ މަރުކަޒީ ބޭންކުގެ ގަވަރުނަރަށެވެ.
އެފްއައިޔޫގެ އިސްވެރިޔާގެ މަގާމަށް އާ ބޭފުޅަކު މި އައްޔަންކުރެއްވީ، އެ މަގާމުގައި ކުރިން ހުންނެވި އިސްމާއިލް ސާޖިދުގެ މައްޗަށް ޖިންސީ ފުރައްސާރަކުރި މައްސަލައެއް ސާބިތުވެ، މިއަހަރުގެ ޖެނުއަރީ މަހު އޭނާ މަގާމުން ވަކިކުރުމާ ގުޅިގެންނެވެ. ސާޖިދު މަގާމުން ވަކިކުރަން ނިންމީ އެމް.އެމް.އޭގެ ޖިންސީ ފުރައްސާރައިގެ މައްސަލަތައް ބަލާ ކޮމިޓީން އެ މައްސަލަ ބަލައި، އޭނާ މަގާމުގައި ބަހައްޓަން ނުފެންނަކަމަށް ނިންމުމާ ގުޅިގެންނެވެ.
