އީރާނުން މިވަގުތު ނިއުކްލިއާ ބޮމެއް އުފައްދަން އުޅޭ ކަމުގެ އެއްވެސް ހެއްކެއް ނެތް ކަމަށް އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ)ގެ ވެރިޔާ ރަފައެލް ގްރޮސީ ވިދާޅުވެއްޖެއެވެ.
އޭނާ މިހެން ވިދާޅުވީ މިދިޔަ ހޮނިހިރު ދުވަހު އީރާނާއި އެމެރިކާ އަދި އިސްރާއީލާ ދެމެދު ހަނގުރާމަ ފެށުމާއި ގުޅިގެންނެވެ.
އެމެރިކާ އިން އީރާނަށް ހަމަލާ ދިނީ ނިއުކްލިއާ ޕްރޮގްރާމާއި ގުޅޭ މަޝްވަރާތަކަށް އެއްބަސްވުމަކަށް ނާދެވި އަދި ބެލިސްޓިކް މިސައިލްގެ ރޭންޖު ލިމިޓް ކުރަން އީރާނުން ދެކޮޅު ހެދުމުން ކަމަށް ޚަބަރުތައް ބުނެއެވެ.
ނަމަވެސް ހަމަލާ ދިނުމުގެ އެއްދުވަސް ކުރިން އީރާނުން ވަނީ ޔުރޭނިއަމް މުއްސަނދި ނުކުރަން ނިންމައި އެކަން އެމެރިކާ އަށް ހުށަހަޅާފައެވެ. މީގެ އިތުރުން މިހާރު ހުރި ޔުރޭނިއަމްގެ ބާރުމިން ދަށް ކުރުމަށް ވެސް އީރާނުން ހުށަހެޅިއެވެ. ނަމަވެސް އެމެރިކާ އިން އެކަން ބަލައެއް ނުގަތެވެ.
