ޖަރުމަނުވިލާތުގެ ބާލިންގައި މިހާރު ކުރިއަށްދާ ދުނިޔޭގެ އެންމެ ބޮޑު ފަތުރުވެރިކަމުގެ ފެއާ، އައިޓީބީ ބާލިންގައި "ވިޒިޓް މޯލްޑިވްސް" ގެ ރަސްމީ ޑިޖިޓަލް ވޮލެޓުގެ ގޮތުގައި "ސްވައިޕް" ރަސްމީކޮށް އިފްތިތާހުކޮށްފި އެވެ.
ބޭންކް އޮފް މޯލްޑިވްސް (ބީއެމްއެލް) އިން މައުލޫމާތު ދޭ ގޮތުގައި، މި ޑިޖިޓަލް ވޮލެޓަކީ ރާއްޖޭގައި އަދި ރާއްޖޭން ބޭރުގައި ފަސޭހަކަމާއެކު، ވަގުތުން ވަގުތަށް ރައްކާތެރިކަމާއެކު ފައިސާގެ މުއާމަލާތްތައް ހިންގޭ ގޮތަށް ފަރުމާކޮށްފައިވާ ޕްލެޓްފޯމެކެވެ. "ސްވައިޕް" އަކީ ސައްތަ އިން ސައްތަ ދިވެހިން އުފައްދާފައިވާ އުފެއްދުމެއްކަން ބީއެމްއެލް އިން ފާހަގަކޮށްފަ އެވެ.
މި ވޮލެޓު މެދުވެރިކޮށް ދުނިޔޭގެ ކޮންމެ ތަނެއްގައި ހުރެގެންވެސް ވަގުތުން ފައިސާ ފޮނުވުމާއި ފައިސާ ބަލައިގަތުމުގެ ފުރުސަތު ލިބިގެންދާނެ އެވެ. މީގެ އިތުރުން، ވިޔަފާރިވެރިންނަށް އެއްވެސް ލަސްކަމެއް ނެތް ގޮތުގައި 'ރިއަލް ޓައިމް' ކޮށް ފައިސާގެ މުއާމަލާތްތައް ނިންމާލެވޭނެ އެވެ. މީގެ ސަބަބުން ވިޔަފާރިތަކުގެ ކޭޝް ފްލޯ މެނޭޖްކުރުމަށް ބޮޑެތި ލުއިފަސޭހަތަކެއް ލިބިގެންދާނެ އެވެ.
މި ޑިޖިޓަލް ވޮލެޓް "ވިޒިޓް މޯލްޑިވްސް" އާ ގުޅިގެން ތައާރަފްކުރުމުގެ މައިގަނޑު މަގުސަދަކީ ރާއްޖެއަށް ޒިޔާރަތްކުރާ ފަތުރުވެރިންނަށާއި ދިވެހި ވިޔަފާރިވެރިންނަށް ޒަމާނީ، ރައްކާތެރި އަދި އަވަސް މާލީ ހިދުމަތްތަކެއް ފޯރުކޮށްދިނުމެވެ. މިއީ ރާއްޖޭގެ ފަތުރުވެރިކަމުގެ ދާއިރާ ޑިޖިޓަލްކުރުމަށް ކުރެވެމުންދާ މަސައްކަތްތަކަށް ލިބުނު މުހިންމު ކުރިއެރުމެކެވެ.
