އިޒްރޭލާއި އެމެރިކާގެ ފައުޖުތަކުން އީރާނަށް ވަރުގަދަ ހަމަލާތަކެއް ދެމުންދާތީ، އެ ގައުމުގެ މަރުހޫމް ރޫހާނީ ލީޑަރު އާޔަތުﷲ އަލީ ހާމަނާއީގެ ޖަނާޒާގެ ރަސްމިއްޔާތުތައް ފަސްކޮށްފި ކަމަށް އީރާނުގެ ކަމާބެހޭ ފަރާތްތަކުން ހާމަކޮށްފި އެވެ.
އީރާނުގެ އޮފިޝަލަކު ވިދާޅުވި ގޮތުގައި، ތެހެރާންގެ މިސްކިތެއްގައި ތިން ދުވަހުގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ މި ރަސްމިއްޔާތުގައި ބައިވެރިވުމަށް ގިނަ އަދަދެއްގެ ބަޔަކު އެދެމުންދާތީ، އެކަމަށް ބޭނުންވާ އިންތިޒާމުތައް ފުރިހަމަކުރުމަށްޓަކައި ޖަނާޒާ ފަސްކުރަން ނިންމީ އެވެ. ކުރިން ރޭވިފައި އޮތީ ބުދަ ދުވަހުގެ ރޭ މި ރަސްމިއްޔާތުތައް ފެށުމަށެވެ.
އާޔަތުﷲ އަލީ ހާމަނާއީ އަވަހާރަވީ މިދިޔަ ހޮނިހިރު ދުވަހު އެމެރިކާއާއި އިޒްރޭލުން އީރާނަށް ދޭން ފެށި ހަމަލާތަކުގެ ތެރޭގަ އެވެ.
އެމެރިކާއާއި އިޒްރޭލުގެ ހަމަލާތަކަށް ރައްދު ދިނުމުގެ ގޮތުން އީރާނުން ވަނީ އިޒްރޭލަށާއި، އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ގައުމުތަކަށް މިސައިލާއި ޑްރޯން ހަމަލާތަކެއް ފޮނުވާލާފަ އެވެ. މި ހަމަލާތަކުގެ ތެރޭގައި ކުވޭތުގެ މީހުން ދިރިއުޅޭ ސަރަހައްދަކަށް ވެއްޓުނު މިސައިލް ބުރިއަކުން ޖެހި، ކުޑަ އަންހެން ކުއްޖަކު މަރުވެފައިވާ ކަމަށް ކުވޭތުގެ ހެލްތު މިނިސްޓްރީން ވަނީ ކަށަވަރުކޮށްދީފަ އެވެ.
މީގެ އިތުރުން، އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ހާމަކުރެއްވި ގޮތުގައި، އިންޑިއާ ކަނޑުގެ ތެރެއިން ސްރީލަންކާގެ އައްސޭރިފަށާ ދުރުގައި އޮތް އީރާނުގެ "އައިރިސް ދޭނާ" ނަމަކަށް ކިޔާ މަނަވަރަކަށް އެމެރިކާގެ ސަބްމެރިންއަކުން ހަމަލާދީ ވަނީ ފައްތާލާފަ އެވެ. ސްރީލަންކާގެ ޑިފެންސް ސެކްރެޓަރީ އެއާ ވައިސް މާޝަލް ސަމްޕަތު ތުއްޔާކޮންތާ ވިދާޅުވި ގޮތުގައި، މި ހާދިސާގައި މަރުވި 80 މީހެއްގެ ހަށިގަނޑު މިހާތަނަށް ވަނީ ފެނިފައެވެ. އަދި 32 މީހަކު ސަލާމަތްކުރެވިފައިވާއިރު، ގިނަ އަދަދެއްގެ ބަޔަކު އަދިވެސް ވަނީ ގެއްލިފަ އެވެ.
ޕީޓް ހެގްސެތު އިތުރަށް ވިދާޅުވީ، ކުރިއަށް އޮތް މަދު ދުވަސްކޮޅެއްގެ ތެރޭގައި އީރާނުގެ ވައިގެ ސަރަހައްދުގެ ފުރިހަމަ ކޮންޓްރޯލް އެމެރިކާއާއި އިޒްރޭލުން ހޯދާނެ ކަމަށެވެ. އަދި މިއީ ހަމަހަމަ ހަނގުރާމައެއް ނޫން ކަމަށާއި، އީރާނު ބަލިކަށިވެފައިވާ ވަގުތެއްގައި ވަރުގަދަ ހަމަލާތަކެއް ދެމުންދާނެ ކަމަށް އޭނާ ވިދާޅުވިއެވެ.
މި ހަމަލާތަކާ ގުޅިގެން އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލާރިޖާނީ ވަނީ އެމެރިކާގެ ރައީސް ޑޮނަލްޑް ޓްރަމްޕަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވީ ޓްރަމްޕް ވަނީ އެމެރިކާގެ ރައްޔިތުން އިންސާފެއް ނެތް ބޮޑު ހަނގުރާމައެއްގެ ތެރެއަށް ވައްޓާލާފައި ކަމަށެވެ.
