މާލެ ސާފުކޮށް ބޭއްވުމަށް ރައްޔިތުންގެ އެއްބާރުލުން ބޭނުންވާ ކަމަށް މާލެ ސިޓީ ކައުސިލުން ބުނެފިއެވެ.
މި ރަމަޟާން މަހު މަގުތަކަށް ގަވައިދާ ހިލާފަ ކުނިއަޅާފައި ހުރި މަންޒަރު ފެންނަ ފޮޓޯއާއެކު އެ ކައުސިލުން އެކްސްގައި ހިއްސާކުރި ޕޯސްޓެއްގައި ބުނީ މާލެ ސިޓީ ސާފުކޮށް ބޭއްވުމަށް ހުރިހާ ރައްޔިތުންގެ އެއްބާރުލުން ބޭނުންވާ ކަމަށެވެ. އަދި ސިޓީ ކައުންސިލުން އަންނަނީ ކޮންމެ ދުވަހަކު ވެސް މަގުމަތިން ކުނި ނެގުމުގެ މަސްއްކަތް ކުރަމުން ކަމަށް އެ ކައުސިލުން ވަނީ ބުނެފައެވެ.
މާލެ ސިޓީ ކައުންސިލުން ހިއްސާކުރި ފޮޓޯތަކުން ފެންނަ ގޮތުގައި މާލޭގެ އެކި ހިސާބުތަކަށް، ރަނގަޅަށް ބަނދު ނުކޮށް، އެކި ޒާތުގެ ފުޅި އާއި ފޮށި ފަދަ ކުނި މަގުމައްޗަށް އުކާލާފައި ހުރި މަންޒަރު ފެނެއެވެ.
މިގޮތަށް މަގުމަތީގައި ކުނި ގިނަވާ ނަމަ މަގުމަތީ ހިނގާ ބިނގާވެ އުޅޭ ފަރާތަކަށް ގިނަ ތަކުލީފުތަކާއި ކުރިމަތިލާން ޖެހޭނެ އެވެ. އަދި މަގު މަތީ އެކި ބާވަތުގެ ކުނި ގިނަވެ ނަޖިސްވާ ނަމަ މި ރަމަޟާން މަހު ނުރައްކާތެރި ބަލިތައް ފެތުރެން މެދުވެރިވެދާނެވެ.
ކުރިއަށް މިހިނގާ ރަމަޟާން މަހަކީ ގިނަ އަދަދަކަށް ގޭބީސީތަކުން ކުނި އުފެދޭ މިންވަރު އިތުރުވާ ދުވަސްތަކަކެވެ. އެހެންކަމުން ކޮންމެ ގެޔަކުން ވެސް ކުނި ނެރޭއިރު، މަގު މައްޗަށް ނޭޅޭ ގޮތަށް ރަނގަޅަށް ބަންދުކޮށްފައި ނެރުން މުހިންމެވެ. އަދި ވެމްކޯއިން ކުނި އުކާލާ ގަޑިތަކަށް ސަމާލުކަންދީގެން ކުނި ނެރުމަށް އިސްކަންދިނުން މުހިންމެވެ.
