އެމެރިކާ އާއި އިސްރާއީލުން އީރާނަށް ޙަމަލާ ދޭން ފެށި ފަހުން މެދުއިރުމަތިން ގާތްގަނޑަކަށް 9،000 އެމެރިކާ މީހުން ފިލައިގެން ގޮސްފިއެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ވަނީ މިކަން ކަށަވަރުކޮށްދީފައެވެ. އޭނާ ބުނީ އެމެރިކާގެ އިތުރު 1،600 އެއްހާ މީހުން މިހާރު އެހީއަށް ވެސް އެދެމުންދާ ކަމަށެވެ.

އެމެރިކާ އިން އީރާނަށް ޙަމަލާ ދޭން ފެށި ފަހުން ތެހެރާނުން ވަނީ ބަދަލު ހިފުމުގެ ގޮތުން ގަލްފުގައި ހުރި އެމެރިކާގެ ބޭސްތަކަށް ޙަމަލާ ދީފައެވެ.

މި ޙަމަލާތައް ދިނުމުގެ ތެރެއިން ތެޔޮ އުފައްދާ ތަންތަނަށް ވެސް ޙަމަލާތަކެއް އަމާޒު ވެފައި ވެއެވެ. ނަމަވެސް އެތަންތަނަށް ޙަމަލާ ދިނީ އީރާނުން ކަމަށް ބެލެވޭ އެއްވެސް ހެއްކެއް އަދި ނުފެނެއެވެ. އީރާނުން ބުނީ ތިމަންނާމެން ޙަމަލާ މިދެނީ ހަމައެކަނި އެމެރިކާގެ ބޭސްތަކަށާއި އެމެރިކާ ސިފައިންނާއި އުޅަނދުތަކަށް އަމާޒުކޮށް އެކަންޏެވެ.

އީރާނުން ވަނީ އެމެރިކާގެ ޑިޕްލޮމެޓިކް މިޝަންތަކަށް ޑްރޯންތަކާއި މިސައިލްތަކުން ޙަމަލާ ދީފައެވެ. އެ ޙަމަލާތައް ހުއްޓުވަން އެމެރިކާއިން ކުރި މަސައްކަތުގެ ތެރެއިން ވެއްޓޭ މިސައިލްތައް ޢަރަބި ޤައުމުތަކުގެ އެކި ހިސާބުތަކަށް ވެއްޓި ގެއްލުން ވެފައި ވެއެވެ.

އިސްރާއީލުން ވަނީ ތެހެރާނުގެ ތާއީދު އޮންނަ ހިޒްބުالله “ފުނޑައިލުމަށް” އެއްގަމު މަގުން ލުބުނާނަށް ވެސް އަރާފައެވެ.