އިސްރާއީލުގެ ސިފައިން ލުބުނާނުގެ ދެކުނަށް އެއްގަމު މަގުން އަރައިގެންފިއެވެ. އިސްރާއީލުގެ ޑިފެންސް ފޯސަސް (އައިޑީއެފް) އިން ކަށަވަރުކޮށްދިން ގޮތުގައި އެމީހުން މިހާރު ވަނީ ޑްރޯނާއި ޓޭންކަރު ތަކާއި އެކު ބޯޑަރު ހުރަސްކޮށް ލުބުނާނުގެ އެތެރެއަށް ވަދެފައެވެ. ޒައެނިސްޓުން ލުބުނާނުގެ ދެކުނުގެ ސަރަހައްދުތަކަށް ވަދެފައި ވަނީ ލުބުނާނުގެ ހަތިޔާރު އެޅި ޖަމާޢަތް ހިޒްބުالله އާއި ގުޅުންހުރި މަގާމުތަކަށް އަމާޒުކޮށްގެންނެވެ.
އިސްރާއީލު ސަރުކާރުން ބުނީ މި އޮޕަރޭޝަނަކީ ފާއިތުވި ދުވަސްތަކުގައި ހިޒްބުالله އިން އިސްރާއީލަށް ރޮކެޓާއި ޑްރޯން ފޮނުވާލުމާއި ގުޅިގެން ބޯޑަރު ކައިރީގައި ސަލާމަތީ ސަރަހައްދެއް އުފެއްދުމަށްޓަކައި ކުރަމުންދާ މަސައްކަތެއް ކަމަށެވެ.
ލުބުނާނުން ރިޕޯޓްކޮށްފައިވާ ގޮތުގައި ބެއިރޫތުގެ ދެކުނުގެ ބައެއް ރަށްތަކަށާއި ބައެއް ހިސާބުތަކަށް ޒައެނިސްޓުން ވަނީ ވައިގެ ހަމަލާތަކެއް ދީ ބައެއް ޢިމާރާތްތައް ބިމާއި ހަމަކޮށް، 40 ވަރަކަށް މީހުން ޝަހީދުކޮށްލައި އެތައް ސަތޭކަ ބަޔަކު ޒަޚަމް ކޮށްފައެވެ. އަދި ރައްކާތެރި ސަރަޙައްދުތަކުން ހިޔާވަހިކަން ހޯދުމަށް 30000 އާންމުން ގެދޮރުން ފިލައިގެން ގޮސްފައިވާ ކަމަށް ވެސް ލުބުނާނުން ބުނެއެވެ.
އިސްރާއީލުން މިވަގުތު ގެންދަނީ ޣައްޒާ އަށާއި ހުޅަނގު އައްސޭރި އަށާއި އީރާނަށް ވެސް ޙަމަލާ ދެމުންނެވެ. އެ މީހުން ޙަމަލާ ދެމުން ގެންދަނީ ބައިނަލްއަޤްވާމީ މުއާހަދާތަކާއި މުޅިން ޚިލާފަށެވެ.
