ސައުދީ އަރަބިޔާގެ ރިޔާޟުގައި ހުންނަ އެމެރިކާގެ އެމްބަސީއަށް އީރާނުން ދެ ޑްރޯންއިން ހަމަލާ ދީފައިވާކަމަށް އެގައުމުގެ ދިފާއީ ވުޒާރާއިން ބުނެފިއެވެ.

އެހާދިސާގައި މައި މަގެއްގައި ހުރި އެމްބަސީ ހިންގާ އިމާރާތުގައި ރޯވުމުގެ އިތުރަށް ބައެއް މާއްދީ ގެއްލުން ލިބިފައިވާ ކަމަށް ޚަބަރު ލިބިފައި ވެއެވެ.

ސައުދީ، ދިފާޢީ ވުޒާރާގެ ރަސްމީ ތަރުޖަމާނު މޭޖާ ޖެނެރަލް ތުރުކީ އަލް މާލީކީ މައުލޫމާތުދެއްވި ގޮތުގައި ދެ ޑްރޯން ބޭނުންކޮށްގެން އެމްބަސީއަށް ދިން ހަމަލާގެކަންތައް ދަނީ ތަހުގީގު ކުރަމުންނެވެ.

ސައުދީގެ ވެރިރަށުގައި ހުރި އެމެރިކާގެ އެމްބަސީއަށް އީރާނުން ހަމަލާ ދިނުމުން ހާމަވެގެންދިޔައީ އެގައުމުގައި ހުރި އެމެރިކާގެ މަރުކަޒުތަކުގެ ދިފާއީކަންތައްތައް އެކަށީގެންވާ ގޮތެއްގައި ނުބެލެހެއްޓޭކަމެވެ.

މިހާދިސާއަށް ފަހު ވަގުތުން ސައުދީ އަރަބިއްޔާގައި ހުންނަ އެމެރިކާގެ މިޝަނުން ވަނީ ޖިއްދާ، ރިޔާޟް އަދި ދަހްރާންގައި ތިބި އެގައުމުގެ ރައްޔިތުން ގޭގައި މަޑުކުރުމުގެ އަމުރެއް ނެރެފައެވެ. އަދި ކޮންމެހެން ބޭނުން ނުވާ ދަތުރުތައް ސަރަހައްދުގެ އެއްވެސް އަސްކަރީ ތަނަކަށް ނުކުރުމަށާއި އެމެރިކާގެ ރައްޔިތުން ގޭގައި މަޑުކުރުމަށް ވެސް ލަފާދީފައި ވެއެވެ.

އެމެރިކާގެ ރައީސް ޑޮނަލްޑް ޓްރަމްޕް މީޑިއާއަކަށް ދެއްވި އިންޓަވިއުއެއްގައި ބުނީ ރިޔާޟުގައި ހުންނަ އެމެރިކާގެ އެމްބަސީއަށް ދިން ހަމަލާއާއި އީރާނާއެކު ކުރަމުންދާ ހަނގުރާމައިގެ ތެރޭގައި މަރުވި އެމެރިކާ ސިފައިންގެ ބަދަލު ހިފަން އެމެރިކާއިން އަޅާ ފިޔަވަޅު ވަރަށް އަވަހަށް އެނގޭނެ ކަމަށެވެ.