ވިޒިޓް މޯލްޑިވްސްގެ ރަސްމީ ޑިޖިޓަލް ވޮލެޓަކަށް "ސްވައިޕް" ހަމަޖައްސައިފިއެވެ.

ބޭންކް އޮފް މޯލްޑިވްސް (ބީއެމްއެލް)އިން އެކްސްގައި ކުރި ޕޯސްޓެއްގައި ބުނީ މިއާއެކު ދިވެހިރާއްޖެއަށް ޒިޔާރަތްކުރާ ފަތުރުވެރިންނަށް ފަސޭހަކަމާއެކު ރައްކާތެރިކަމާއެކީ ފައިސާގެ މުއާމަލާތްތައް ހިންގޭނެ އެންމެ އިސް ވަސީލަތަކަށް "ސްވައިޕް" ވެގެންދާނެ ކަމަށެވެ.

އަދި މިއީ ޑިޖިޓަލް އީޖާދުތަކަށް ރާއްޖެއިން ދޭ އަހަންމިއްޔަތާއި، ރާއްޖޭގެ މަތީ ފަންތީގެ މެހެމާންދާރީ އިތުރަށް ފުރިހަމަކޮށްދޭނެ މުހިންމު ފިޔަވަޅެއް ކަމަށް ބީއެމްއެލް އިން ވަނީ ފާހަގަކޮށްފައެވެ.

ސްވައިޕަކީ ބީއެމްއެލް އިން ތައާރަފްކުރި, ރާއްޖެއާއި ރާއްޖެއިން ބޭރުގައި، އެއްވެސް ދަތިކަމެއް ނެތި، ރައްކާތެރިކަމާއެކު ވަގުތުން ފައިސާގެ މުއާމަލާތްތައް ހިންގޭނެ އައު މަލްޓި-ކަރަންސީ ޑިޖިޓަލް ވޮލެޓެކެވެ.

ސައްތަ އިންސައްތަ ދިވެހިންގެ އުފެއްދުމެއްގެ ގޮތުގައި ތަރައްގީކޮށްފައިވާ މި ޑިޖިޓަލް ވޮލެޓަކީ، ބައިނަލްއަގުވާމީ ފައިނޭންޝަލް ޓެކްނޮލޮޖީގެ މައިދާނުގައި ދިވެހިންގެ ހުނަރާއި ރާއްޖޭގެ ނަން ފާހަގަކޮށްދޭނެ އުފެއްދުމެކެވެ.

ބީއެމްއެލް އިން ބުނީ މި ސަރަހައްދުގެ އެންމެ ފެންވަރު ރަނގަޅު ޑިޖިޓަލް ބޭންކަށް ވުމަށް ގެންގުޅޭ ތަސައްވަރު ހާސިލުކުރުމުގައި "ސްވައިޕް" އަކީ ފާހަގަކޮށްލެވޭ މުހިންމު ކުރިއެރުމަކަށް ވެގެންދާނެކަމަށެވެ.