އިސްރާއީލުން ބެއިރޫތާއި ލުބުނާނުގެ ދެކުނަށް އިއްޔެ އާއި ރޭ ދިން ވައިގެ ހަމަލާތަކުގައި 52 މީހުން މަރުވެ 154 މީހުން ޒަޚަމްވެފައިވާ ކަމަށް ލުބުނާނުގެ ކަމާބެހޭ ފަރާތްތަކުން ބުނެފިއެވެ.
ސަރުކާރުގެ ޑިޒާސްޓާ މެނޭޖްމަންޓް ޔުނިޓުން ނެރުނު ބަޔާނެއްގައި ބުނެފައި ވަނީ އިއްޔެ އިން ފެށިގެން އިސްރާއީލުގެ ހަނގުރާމަ މަތިންދާބޯޓުތަކުން އެގައުމަށް 221 ވައިގެ ހަމަލާ ދީފައިވާ ކަމަށެވެ.
މި ހަމަލާތައް ދީފައިވަނީ އިސްރާއީލުން ލުބުނާނަށް މިހާރު ދެމުންދާ ހަމަލާތަކާއި އީރާނާއި ދެކޮޅަށް އެމެރިކާއާއި އިސްރާއީލުން ގުޅިގެން ކުރާ ހަނގުރާމަ އަށް ރައްދުދީ އިސްރާއީލުގެ އަސްކަރީ ތަނަކަށް ހިޒްބުالله އިން ހަމަލާ ދިނުމުންނެވެ.
ހޮނިހިރު ދުވަހުން ފެށިގެން އެމެރިކާއާއި އިސްރާއީލުން އީރާނަށް ވަރަށް ވަރުގަދަ ހަމަލާތަކެއް ދިީ، އީރާނުގެ އިސް ލީޑަރުންތަކެއް ކަމަށްވާ ސުޕްރީމް ލީޑަރު އާޔަތުالله އަލީ ޚާމަނާއީ އާއި އަސްކަރީ އިސް އޮފިޝަލުންގެ 30 އަށް ވުރެ ގިނަ މީހުން އަވަހާރަކޮށްލި އެވެ.
