ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެންބަރު އަދި މަޝްހޫރު ވިޔަފާރިވެރިޔާ އަބްދުﷲ ޖާބިރު، މީގެ 15 އަހަރު ކުރިން 14 މިލިއަން ރުފިޔާއަށް ބައްލަވައިގަތް މ. އަތަމާޕްލާޒާގެ މިލްކުވެރިކަމުގެ މައްސަލަ ޖާބިރު ކާމިޔާބު ކުރައްވައިފި އެވެ. ސިވިލް ކޯޓުން އިއްޔެ ކުރި ހުކުމުގައިވަނީ އެ އިމާރާތުގެ މިލްކުވެރިކަން ޖާބިރަށް ނަގުލުކޮށްދިނުމަށެވެ.
މަލީޝާ ހައްޖު ގްރޫޕުގެ ވެރިޔާ އިސްމާއީލް އަބްދުއްލަތީފްގެ ނަމުގައި ރަޖިސްޓްރީކޮށްފައިވާ މި އިމާރާތް ޖާބިރު ބައްލަވައިގަތީ 2010 ވަނަ އަހަރުއެވެ. ނަމަވެސް، އިސްމާއީލް އަބްދުއްލަތީފްގެ މައްޗަށް ސާބިތުވި ދަރަންޏެއްގެ ހުކުމް ތަންފީޒު ކުރުމަށްޓަކައި އެ ގެ ވިއްކާލަން ކޯޓުން މީގެ ކުރިން އިއުލާންކޮށް، ނީލަން ކިޔަން ވެސް ހުޅުވާލިއެވެ. 770 އަކަފޫޓުގެ މި ބިމުގައި ހުރީ 10 ބުރީގެ އިމާރާތެކެވެ.
ޖާބިރު ވިދާޅުވާ ގޮތުގައި 2010 ވަނަ އަހަރު އޭނާ ވަނީ އެތަން ބައްލަވައިގަތުމަށް 14 މިލިއަން ރުފިޔާ ދައްކަވައިފައެވެ. ނަމަވެސް، އެ ގޭގެ ރަޖިސްޓްރީ އޭނާގެ ނަމަށް ބަދަލުކޮށްފައެއް ނުވެއެވެ. މި މުއާމަލާތުގެ އިޖުރާއަތް ފުރިހަމަކުރަން އިސްމާއިލްގެ ފަރާތުން 2017 ވަނަ އަހަރު ކޯޓަށް މައްސަލަ ހުށަހެޅުމަށްފަހު ފަހުން ވަނީ އަނބުރާ ގެންގޮސްފައެވެ. އެހެންކަމުން، ރަޖިސްޓްރީ ބަދަލުކުރުމަށް ހުރަސްއެޅިފައިވާތީ ޖާބިރުގެ ފަރާތުން 2021 ވަނަ އަހަރު ދައުވާ ހުށަހެޅީއެވެ.
ސިވިލް ކޯޓުގެ ހުކުމުގައި ބުނެފައިވަނީ ޖާބިރާއި އިސްމާއިލްއާ ދެމެދު އޮތް ގަނެވިއްކުމުގެ އެއްބަސްވުމުގެ ދަށުން އަތަމާޕްލާޒާއަކީ އެތަނުގެ މިލްކުވެރިކަން ޖާބިރަށް ނަގުލު ކުރުމުގެ ހައްގު ލިބިގެންވާ ތަނެއް ކަމަށެވެ. އަދި "އެ ހައްގުގެ މައްޗަށް އިސް ކުރެވޭނެ އެހެން އެއްވެސް ހައްގެއް ނެތް" ކަމަށް ވެސް ހުކުމުގައި ފާހަގަކޮށްފައިވެއެވެ.
ކޯޓުން ވަނީ އެ އިމާރާތާއި އެތަނުގައި ހަރުކޮށްފައިވާ ތަކެތީގެ މިލްކުވެރިކަން ޖާބިރަށް ބަދަލުކުރުމުގެ ޝަރުއީ އިޖުރާއަތްތައް ކުރިއަށް އޮތް ދެ މަސް ދުވަހުގެ ތެރޭގައި ނިންމުމަށް އިސްމާއިލް އަބްދުއްލަތީފްގެ މައްޗަށް އަމުރުކޮށްފައެވެ. ނަމަވެސް، ގެއްލުމުގެ ބަދަލުގެ ގޮތުގައި 16 މިލިއަން ރުފިޔާ ހޯދަން ޖާބިރުގެ ފަރާތުން އެދުނު ނަމަވެސް، ކޯޓުން ނިންމީ އެ ފައިސާ ނަގައިދެވެން ނެތް ކަމަށެވެ.
އިސްމާއީލް އަބްދުއްލަތީފަކީ ގިނަ ބައެއްގެ އަތުން ފައިސާ ނެގުމަށްފަހު ހައްޖަށް ގެންގޮސްނުދިން މައްސަލާގައި މަކަރާއި ހީލަތުގެ ކުށުގައި 2019 ވަނަ އަހަރު އަށް އަހަރުގެ ޖަލު ހުކުމެއް އައިސްފައިވާ ފަރާތެއްކަން ފާހަގަކުރެވެއެވެ.
