އީރާނުގެ މުހިއްމު އެތައް ސައިޓަކަށް އެމެރިކާ އާއި އިސްރާއީލުން ދިން ވަރުގަދަ ވައިގެ ހަމަލާތަކުގައި އީރާނުގެ ދިފާއީ ދާއިރާގެ އިސް ބައެއް އޮފިޝަލުން މަރުވެފައިވާ ކަމަށް ރިޕޯޓްތައް ބުނެފިއެވެ. މަރުވެފައިވާ ކަމަށް ރިޕޯޓްކޮށްފައިވާ މީހުންގެ ތެރޭގައި އީރާނުގެ ޑިފެންސް ކައުންސިލްގެ ސެކްރެޓަރީ އަދި ސުޕްރީމް ލީޑަރު އަލީ ޚާމަނާއީގެ ގާތް މުޝީރެއް ކަމަށްވާ އަލީ ޝަމްޚާނީ ވެސް ހިމެނެއެވެ.

އީރާނުގެ މީޑިއާތަކާއި ބައިނަލްއަގްވާމީ ރިޕޯޓްތައް ބުނާ ގޮތުގައި ޝަމްޚާނީ މަރާލާފައި ވަނީ އަސްކަރިއްޔާގެ މަތީ ފެންވަރުގެ ވެރިންނާއި ސިޔާސީ އިސް ވެރިންނަށް އަމާޒުކޮށްގެން ދިން ހަމަލާތަކުގެ ތެރެއިންނެވެ.

އުމުރުން 70 އަހަރުގެ ޝަމްޚާނީ އަކީ އީރާނުގެ ސަލާމަތީ މުއައްސަސާގެ އެންމެ ނުފޫޒުގަދަ އެއް ފަރާތެއްގެ ގޮތުގައި ބެލެވޭ އަދި ދާދި ފަހުން އީރާނުގެ ނިއުކްލިއާ ޕްރޮގްރާމާ ގުޅޭ ގޮތުން އެމެރިކާއާ އެކު މަޝްވަރާތަކުގައި ބައިވެރިވި އެކަކު ކަމަށް ވެއެވެ. މީގެ ކުރިން ޑިފެންސް މިނިސްޓަރުކަން ބެސް އޭނާ ކުރެއްވިއެވެ.

އަދި ހަމަ އެ ހަމަލާތަކުގައި ބާރުގަދަ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ކޮމާންޑަރު މުހައްމަދު ޕަކްޕޫރު ވެސް މަރުވެފައިވާ ކަމަށް ރިޕޯޓްތައް ބުނެ އެވެ. ޕަކްޕޫރަކީ އީރާނުގެ އެންމެ އިސް އަސްކަރީ ލީޑަރުންގެ ތެރެއިން އެކަކު ކަމަށް ވެއެވެ. އަދި އައިއާރުޖީސީގެ އަސްކަރީ އޮޕަރޭޝަންތަކާއި މިސައިލް ފޯސްތައް ބެލެހެއްޓުމުގެ އެންމެ އިސް ލީޑަރެވެ.

އިސްރާއީލުން ބުނީ އެމީހުންގެ މި ހަމަލާތައް އަމާޒުކޮށްފައި ވަނީ އީރާނުގެ މިސައިލް އަދި ނިއުކްލިއާ ޕްރޮގްރާމްތަކާއި ގުޅުން ހުރި އީރާނުގެ ސަލާމަތީ އަދި ދިފާއީ ދާއިރާގެ އިސް އޮފިޝަލުންތަކަކަށެވެ. އިތުރު ބައެއް ކޮމާންޑަރުންނާއި އެޑްވައިޒަރުން ވެސް މަރުވެފައިވާ ކަމަށް ރިޕޯޓްތައް ބުނެއެވެ.