އީރާނުން އިސްރާއީލުގެ އެކި ސިޓީތަކަށް އަމާޒުކޮށް ވަރުގަދަ މިސައިލް ހަމަލާތަކެއް ދޭން ފަށައިފިކަން މިހާރު ވަނީ ރަސްމީކޮށް ކަށަވަރުވެފަ އެވެ. މި ހަމަލާތަކާ ގުޅިގެން މުޅި އިސްރާއީލުގައި ނުރައްކަލުގެ ރަނގަބީލު ދަނީ މެދުކެނޑުމެއް ނެތް ގޮތެއްގައި ގޮވަމުންނެވެ.

މި ހަމަލާތަކާ ގުޅޭގޮތުން ލިބެމުންދާ އެންމެ ފަހުގެ މައުލޫމާތުތަކަށް ބަލާއިރު، އީރާނުން ފޮނުވާލި މިސައިލްތައް އިސްރާއީލުގެ އެކި ސަރަހައްދުތަކަށް ވަނީ އަމާޒުވެފައެވެ. އީރާނުން މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ އިސްރާއީލުގެ އިސް ވެރިން ދިރިއުޅޭ ސަރަހައްދުތަކަށާއި، އެ ގައުމުގެ އަސްކަރީ އެންމެ މުހިންމު މަރުކަޒުތަކަށެވެ.

އީރާނުގެ މި ކުއްލި އަދި ވަރުގަދަ ހަމަލާތަކާ ގުޅިގެން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މިހާރު ވަނީ ރައްކާތެރިކަން ހޯދުމަށް ބިންގަރާހަކަށް (ބަންކަރަކަށް) ވަދެފައެވެ. ނަތަންޔާހޫ އިތުރުން އިސްރާއީލުގެ ސަރުކާރުގެ އިސްވެރިންނާއި އަސްކަރީ ކޮމާންޑަރުން ވެސް މިހާރު ތިއްބެވީ ބިންގަރާސްތަކުގައި ރައްކާތެރިކަން ހޯދައިގެންނެވެ.

އިސްރާއީލުގެ ދިފާއީ ބާރުތަކުން ބުނެފައިވާ ގޮތުގައި އީރާނުން ދެމުންދާ މި ހަމަލާތަކުގައި އެތައް ސަތޭކަ ބެލިސްޓިކް މިސައިލެއް ވަނީ ބޭނުންކޮށްފައެވެ. މި ހަމަލާތަކުގެ ސަބަބުން އިސްރާއީލުގެ ވައިގެ ސަރަހައްދު މިހާރު ވަނީ މުޅިން ބަންދުކޮށްފައެވެ. އަދި އާންމު ރައްޔިތުންނަށް ވަނީ ވީ އެންމެ އަވަހަކަށް ރައްކާތެރި ބަންކަރުތަކަށް ވަނުމަށް އަންގާފައެވެ.

މަންޒަރު ދުށް މީހުން ރިޕޯޓްކުރާ ގޮތުގައި އިސްރާއީލުގެ ވެރިރަށް ތަލް އަބީބާއި އެހެނިހެން ބޮޑެތި ސިޓީތަކުގެ އުޑުމަތިން ގިނަ އަދަދެއްގެ މިސައިލް ދަތުރުކުރަމުންދާ މަންޒަރު ފެންނަމުންދެއެވެ. ބައެއް މިސައިލްތައް އިސްރާއީލުގެ ދިފާއީ ނިޒާމު "އަޔަން ޑޯމް" ފޫއަޅުވާލުމަށްފަހު ބިމަށް ވެއްޓި ބޮޑެތި ގޮވުންތަކެއް ގޮވަމުންދާ ކަމަށް ވެސް މައުލޫމާތު ލިބެއެވެ.

އީރާނުން މި ހަމަލާ ދީފައިވަނީ އިސްރާއީލުން ފަހަކަށް އައިސް މެދުއިރުމަތީގައި ހިންގަމުންދާ ލާއިންސާނީ އަމަލުތަކާއި، ހަމާސް އަދި ހިޒްބުﷲގެ އިސްވެރިން އަވަހާރަކޮށްލުމުގެ ބަދަލުހިފުމުގެ ގޮތުން ކަމަށް ބެލެވެއެވެ. މި ހަމަލާއާއެކު މެދުއިރުމަތީގެ މަސްރަހު ވަނީ ނުހަނު ބޮޑަށް ގޯސްވެ، ބޮޑު ހަނގުރާމައެއްގެ ބިރުވެރިކަން މުޅި ސަރަހައްދަށް ވަނީ ކުރިމަތިވެފައެވެ.