ފުލުހުންގެ ދައުރު އަދާކުރުމަށް ހުރަސް އެޅުމުގެ ތުހުމަތުގައި، ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރާއި އިތުރު ދެ މީހެއްގެ މައްޗަށް ދައުވާކުރުމަށް ޕްރޮސެކިއުޓާ ޖެނެރަލް (ޕީޖީ) ގެ އޮފީހަށް ފޮނުވައިފިއެވެ.

މި މައްސަލައިގައި މައުރޫފްގެ އިތުރުން ދައުވާކުރަން ފޮނުވާފައިވަނީ އެމްޑީޕީގެ ގައުމީ މަޖިލިސް މެންބަރު ފާތިމަތު ޒަހިއްޔާ (ޒާޔާ) އާއި ނ. ހޮޅުދޫ، މާފޮޅޭވިލާ، އަބްދުއްސަލާމްގެ މައްޗަށެވެ.

ފުލުހުން މި ތިން މީހުންނަށް ފޮނުވި މައްސަލަ ނިމުނު ގޮތުގެ ލިޔުމުގައިވާ ގޮތުން، މި މައްސަލައިގެ ތަހުގީގު ނިންމައި ޕީޖީ އޮފީހަށް ހުށަހަޅާފައިވަނީ މިދިޔަ ބުރާސްފަތި ދުވަހުއެވެ. އެ ތިން މީހުންގެ މައްޗަށްވެސް ފުލުހުން އުފުލާފައިވަނީ ޣައިރު ގާނޫނީ އެއްވުމެއް ރޫޅާލުމަށް އުޅޭ މީހާއަށް ހުރަސްއެޅުމުގެ ކުށުގެ ދައުވާއެވެ.

މި ދައުވާތަކަކީ މިދިޔަ އަހަރުގެ އޮކްޓޯބަރު މަހުގެ ތިން ވަނަ ދުވަހުގެ ރޭ މާލޭގެ އެކި ސަރަހައްދުތަކުގައި ކުރި މުޒާހަރާއަކާ ގުޅިގެން ކުރާ ދައުވާތަކެކެވެ. ފުލުހުން ބުނެފައިވާ ގޮތުގައި އެ ރޭ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް މަގުތަކަށް އެއްވެ، އާންމު ދަތުރުފަތުރަށާއި ވިޔަފާރިތަކަށް ހުރަސްއެޅޭ ގޮތަށް ވަނީ އަމަލުކޮށްފައެވެ.

މީގެ އިތުރުން، އެ އެއްވުން ރޫޅާލުމަށް ފުލުހުން ކުރި މަސައްކަތަށް ހުރަސްއަޅައި، ފުލުހުންގެ އަމުރަށް ނުކިޔަމަންތެރިވެ، ވާޖިބު އަދާކުރުމަށް ހުރަސްއަޅާފައިވާ ކަމަށްވެސް ފުލުހުންގެ ތަހުގީގަށް ވަނީ ފާހަގަކުރެވިފައެވެ. އެ ރޭގެ މުޒާހަރާއާ ގުޅިގެން މައުރޫފާއި ޒާޔާގެ އިތުރުން އެހެން ބަޔަކުވެސް ހައްޔަރުކުރިކަން ފާހަގަކޮށްލެވެއެވެ.

މެމްބަރު މައުރޫފް ޒާކިރަކީ މަސްވެރިންގެ ޔޫނިއަންގެ އެއް ފައުންޑަރު އަދި އެ ޖަމިއްޔާގެ ޖެނެރަލް ސެކްރެޓަރީއެވެ. އޭނާ ވަނީ މިދިޔަ އަހަރުގެ ޑިސެމްބަރު މަހު ބޮޑުކަންނެލީގެ މަސްވެރިން ކުރި އިހުތިޖާޖާ ގުޅިގެންވެސް ހައްޔަރުކޮށްފައެވެ.