ގއ. ކޮލަމާފުށީގައި މިހާރު އޮތް އެމްޑީޕީގެ ކައުންސިލް ބަދަލުކޮށް، ސަރުކާރު ހިންގާ ޕީއެންސީގެ ކައުންސިލެއް އިންތިހާބު ކުރުމުގެ ވަރުގަދަ އަޒުމުގައި އެރަށުގެ ޒުވާނުންގެ މެދުގައި މަޝްހޫރު "ޓީމް ޔުނައިޓެޑް ކޮލަމާފުށި" (ޓީމް ޔޫކޭ) މިއަދު އެރަށަށް ފުރައިފި އެވެ.
މި ދަތުރަކީ ކުރިއަށް އޮތް ކައުންސިލް އިންތިހާބަށާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބަށް ޕީއެންސީގެ ކެންޑިޑޭޓުންނަށް ތާއީދު ހޯދުމަށާއި، ރަށުގައި ސަރުކާރު ކޯލިޝަންގެ ހަރަކާތްތައް ވަރުގަދަ ކުރުމަށް ކުރާ ދަތުރެކެވެ. ޓީމް ޔޫކޭގެ ފަރާތުން މައުލޫމާތު ދީފައިވާ ގޮތުގައި، ރަށުގައި ޕީއެންސީގެ ކުލަގަދަ ކުރުމާއި، ކެމްޕެއިން ޕޯސްޓަރުތައް ހަރުކުރުމުގެ އިތުރުން ވޯޓު ހޯދުމުގެ މަސައްކަތްތައް މިއަދުން ފެށިގެން މެދުނުކެނޑި ކުރިއަށްދާނެ އެވެ.
ޓީމް ޔޫކޭއިން ބުނި ގޮތުގައި، އޭޕްރީލް 4 ވަނަ ދުވަހު ބާއްވާ އިންތިހާބުގައި ކޮލަމާފުށީގެ ބޮޑު އިންސައްތައެއް ވޯޓު އަޅާނީ ޕީއެންސީގެ ރަމްޒު ކަމުގައިވާ "ދޫންޏާ" ދިމާލުގައި ހެޔޮ ފާހަގަ ޖަހައިގެންނެވެ.
މި މުހިންމު ކެމްޕެއިން ދަތުރުގައި ކޮލަމާފުށީ ދާއިރާގެ އިއްޒަތްތެރި މެންބަރު އިބްރާހިމް ދީދީ އާއި، ޔޫތު މިނިސްޓްރީގެ އެޑްވައިޒަރު އަހްމަދު ނަރީޝްގެ އިތުރުން ސަރުކާރުގެ އެކި މަގާމުތަކުގައި ތިއްބެވި ބޭފުޅުން ބައިވެރިވެވަޑައިގެންނެވި އެވެ.
ކައުންސިލްތަކުގެ މެޖޯރިޓީ ސަރުކާރަށް ލިބުމުގެ މުހިންމުކަމާ ގުޅޭގޮތުން ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެފައިވަނީ، ކައުންސިލްތަކުގެ އެއްބާރުލުން ނުލިބުމުގެ ސަބަބުން ރާއްޖޭގެ 57 ރަށެއްގައި ތަރައްގީގެ މަޝްރޫއުތައް ހުއްޓިފައިވާ ކަމަށެވެ. ބުރާސްފަތި ދުވަހުގެރޭ އާޓިފިޝަލް ބީޗުގައި ބޭއްވި ތަރާވީހެއްގައި ވާހަކަފުޅު ދައްކަވަމުން ރައީސް ވަނީ، ތަރައްގީގެ ދުވެލި ބާރުކުރުމަށްޓަކައި އޭޕްރީލް 4 ގައި އޮންނަ ވޯޓުގައި ޕީއެންސީގެ ކެންޑިޑޭޓުންނަށް ވޯޓު ދެއްވުމަށް އިލްތިމާސް ކުރައްވާފަ އެވެ.
