އިންޑިއާގެ މަޝްހޫރު ފިލްމީ ތަރިން ކަމަށްވާ ރަޝްމިކާ މަންދަންނާ އާއި ވިޖޭ ދޭވަރަކޮންޑާ ރަސްމީކޮށް ކައިވެނިކޮށްފިއެވެ. ގިނަ ދުވަސްތަކެއް ވަންދެން ދެމީހުންގެ މެދުގައި ލޯބީގެ ގުޅުމެއް އޮންނަ ކަމަށް ދެކެވުނު ވާހަކަތަކަށްފަހު، މި އުފާވެރި ހަބަރު ދެތަރިން ވަނީ ސޯޝަލް މީޑިއާ މެދުވެރިކޮށް ފޭނުންނާ ހިއްސާކޮށްފަ އެވެ.
މި ކައިވެނީގެ ރަސްމިއްޔާތު ބާއްވާފައިވަނީ އިއްޔެ އިންޑިއާގެ ރާޖަސްތާނުގެ އުދައިޕޫރުގަ އެވެ. އާއިލާއާއި ގާތް ރައްޓެހިންނާއެކު ބޭއްވި މި ހާއްސަ ރަސްމިއްޔާތުގައި ދެމީހުންގެ ސަގާފަތް ކަމަށްވާ ޓެލުގޫ ހިންދޫ އަދި ކޮޑަވާ ރަސްމީ އާދަކާދަތައް ވަނީ ކުރިއަށް ގެންގޮސްފަ އެވެ.
ރަޝްމިކާ މަންދަންނާ އާއި ވިޖޭ ދޭވަރަކޮންޑާ ކައިވެނިކުރި ވަގުތު---
ރަޝްމިކާ އިންސްޓަގްރާމްގައި ހިއްސާކުރި ކައިވެނީގެ ފޮޓޯތަކާއެކު ލިޔެފައިވަނީ ވިޖޭއަކީ އޭނާގެ "ފިރިމީހާ" ކަމަށެވެ. އަދި ހަގީގީ ލޯތްބަކީ ކޮބައިކަން އޭނާއަށް ދަސްކޮށްދިނީ ވިޖޭ ކަމަށާއި، އޭނާގެ ހަޔާތަށް އުފާވެރިކަމާއި ހަމަޖެހުން ގެނެސްދިނީ ވެސް ވިޖޭ ކަމަށް ރަޝްމިކާ ވަނީ ބުނެފަ އެވެ.
ވިޖޭ ދޭވަރަކޮންޑާ ވެސް ވަނީ އޭނާގެ އިހުސާސްތައް ބަންޑުންކޮށްލާފަ އެވެ. އޭނާ ބުނި ގޮތުގައި ރަޝްމިކާ ނެތި އޭނާގެ ދިރިއުޅުމުގެ އެއްވެސް ކަމެއް ފުރިހަމައެއް ނުވެ އެވެ. "އެހެންކަމުން، އަހަރެންގެ އެންމެ ގާތް އެކުވެރިޔާ، އަހަރެންގެ އަނބިމީހާއަށް ހަދައިފިން،" ވިޖޭ ލިޔެފައިވެ އެވެ.
ކައިވެނީގެ ތެރެއިން މާފަތި ބަދަލުކުރުމުގެ ވަގުތުކޮޅަކީ ގިނަ ބައެއްގެ ހިތްތަކަށް އަސަރުކުރުވި ވަގުތުކޮޅެކެވެ. އެ ވަގުތު ދެ ތަރިންގެ ލޮލުން ވެސް އުފާވެރިކަމުގެ ކަރުނަ ވަނީ ފާޅުވެފަ އެވެ. ވިޖޭގެ ކޮއްކޮ އާނަންދު ދޭވަރަކޮންޑާ ވަނީ ރަޝްމިކާއަށް ވަރަށް ހޫނު މަރުހަބާއެއް ކިޔާފަ އެވެ.
މި ކައިވެނީގެ ބޮޑު ހަފްލާ ބޭއްވުމަށް ހަމަޖެހިފައިވަނީ އަންނަ މާޗު މަހުގެ 4 ވަނަ ދުވަހު ހައިދަރުއާބާދުގަ އެވެ. މި ހަފުލާގައި ފިލްމީ ދާއިރާގެ ގިނަ ތަރިން ބައިވެރިވާނެ ކަމަށް ބެލެވެ އެވެ.
ރަޝްމިކާ އާއި ވިޖޭގެ މި ކައިވެންޏަކީ މިއަހަރުގެ ތެރޭގައި ފިލްމީ ދާއިރާގައި ހިނގި އެންމެ ރޮމޭންޓިކް އަދި ގިނަ ބަޔަކު އިންތިޒާރު ކުރަމުންދިޔަ އެއް ކައިވެންޏެވެ. ދުނިޔޭގެ އެކި ކަންކޮޅުތަކުގައި ތިބި ފޭނުން ދަނީ ސޯޝަލް މީޑިއާގައި މި ދެމަފިރިންނަށް މަރުހަބާ ކިޔަމުންނެވެ.
