ދެކުނު އެފްރިކާގައި ދިރިއުޅޭ ދޮން ނަސްލުގެ މީހުންގެ ތެރެއިން މަހަކު 4،500 މީހުން ރެފިއުޖީންގެ ގޮތުގައި އެމެރިކާއަށް އެތެރެކުރުމުގެ މަޝްރޫއެއް އެމެރިކާ ސަރުކާރުން އެކުލަވާލައިފި އެވެ.

ރޮއިޓާސް ނިއުސް އެޖެންސީއަށް ލިބިފައިވާ ރަސްމީ ލިޔެކިއުންތަކާ ހަވާލާދީ ރިޕޯޓްކޮށްފައިވާ ގޮތުގައި، މި ނިންމުމަކީ ދެކުނު އެފްރިކާގައި ދޮން ނަސްލުގެ މީހުންނަށް ކުރިމަތިވަމުންދާ ނުރައްކާތަކާއި ތަފާތުކުރުންތަކުން އެމީހުން ސަލާމަތްކުރުމަށް އެމެރިކާ ސަރުކާރުން އެޅި ފިޔަވަޅެކެވެ.

މި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ އެމެރިކާގެ ރެފިއުޖީ އެޑްމިޝަން ޕްރޮގްރާމްގެ ދަށުންނެވެ. މިގޮތަށް ކަނޑައެޅިފައިވާ މީހުންނަކީ ދެކުނު އެފްރިކާގައި ހިނގަމުންދާ ހަމަނުޖެހުންތަކާއި، ބިމުގެ މައްސަލަތަކުގެ ސަބަބުން ނުރައްކަލަށް ހުށަހެޅިފައިވާ އާއިލާތަކެއް ކަމަށް އެމެރިކާގެ ކަމާބެހޭ އިދާރާތަކުން ފާހަގަކުރެ އެވެ.

މި ނިންމުމާ ގުޅިގެން ބައިނަލްއަގުވާމީ ދާއިރާގައި އެކި ފަރާތްތަކުން އަންނަނީ ހިޔާލު ފާޅުކުރަމުންނެވެ. ބައެއް ފަރާތްތަކުން މި ފިޔަވަޅަކީ އިންސާނީ ހައްގުތަކަށްޓަކައި އެޅި މުހިންމު ފިޔަވަޅެއްގެ ގޮތުގައި ސިފަކުރާއިރު، އަނެއް ބަޔަކު ދެކޭގޮތުގައި މިއީ ވަކި ނަސްލަކަށް އިސްކަންދީގެން ނިންމާފައިވާ ނިންމުމެކެވެ.

އެމެރިކާ ސަރުކާރުން ބުނެފައިވަނީ، މި މަޝްރޫއުގެ ދަށުން ގެންނަ މީހުންނަށް ބޭނުންވާ ވަސީލަތްތަކާއި، ވަޒީފާގެ ފުރުސަތުތައް ފަހިކޮށްދިނުމުގެ މަސައްކަތް މިހާރު ފަށާފައިވާ ކަމަށެވެ. އަދި މި ޕްރޮގްރާމްގެ ދަށުން ފުރަތަމަ ގުރޫޕް ކުރިއަށް އޮތް މަސްތަކުގެ ތެރޭގައި އެމެރިކާއަށް ދަތުރުކުރާނެ ކަމަށް ބެލެވެއެވެ.

އެމެރިކާ ސަރުކާރުގެ މި ނިންމުމާ ގުޅިގެން އެގައުމުގެ ސަރުކާރަކީ ނަސްލީ ތަފާތުކުރުންތައް ބޮޑު ސަރުކާރެއްގެ ގޮތުގައި ވަރަށް ގިނަ ބަޔަކު ދަނީ ދެކެމުންނެވެ. މިދިޔަ އަހަރު މެއި މަހު ދެކުނު އެފްރިކާއިން އެމެރިކާއަށް ރެފުއިޖީންގެ ގޮތުގައި 59 ދޮން މީހުން އެތެރެކޮށްފައިވެ އެވެ.