އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން، އެމެރިކާގައި ދިރިއުޅޭ ސޫރިޔާގެ ރައްޔިތުންނަށް ދީފައިވާ ހާއްސަ ހިމާޔަތް ނުވަތަ "ޓެމްޕަރަރީ ޕްރޮޓެކްޓެޑް ސްޓޭޓަސް" (ޓީޕީއެސް) އުވާލުމަށް އެމެރިކާގެ ސުޕްރީމް ކޯޓުގައި ރަސްމީކޮށް އެދިއްޖެ އެވެ.

މިދިޔަ ބުދަ ދުވަހު ސަރުކާރުން ކޯޓަށް ހުށަހެޅި ލިޔުންތަކުގައި ބުނެފައިވަނީ، ސޫރިޔާގެ މަޝްރަހު މިހާރު ބަދަލުވެފައިވާ ކަމަށާއި، އެ ގައުމުގެ ރައްޔިތުންނަށް އެމެރިކާއިން ދެމުންދާ ހާއްސަ ހިމާޔަތް އިތުރަށް ކުރިއަށް ގެންދަންޖެހޭ ގާނޫނީ ސަބަބެއް މިހާރު ނެތް ކަމަށެވެ. މީގެ ކުރިން ދަށު ކޯޓުތަކުން ވަނީ މި ހިމާޔަތް އުވާލުމަށް ސަރުކާރުން ކުރަމުންދާ މަސައްކަތްތަކަށް ހުރަސް އަޅާފަ އެވެ.

ޓީޕީއެސް އަކީ ހަނގުރާމަ، ގުދުރަތީ ކާރިސާ ނުވަތަ ނުރައްކާތެރި ހާލަތްތަކާ ގުޅިގެން އަމިއްލަ ގައުމަށް ދެވެން ނެތް ބޭރު ގައުމުތަކުގެ މީހުންނަށް، އެމެރިކާގައި ވަގުތީ ގޮތުން މަސައްކަތްކޮށް ދިރިއުޅުމަށް ދޭ ހާއްސަ ހުއްދައެކެވެ. ސޫރިޔާގެ އެތައް ހާސް ރައްޔިތުންނެއް މި ހިމާޔަތުގެ ދަށުން އެމެރިކާގައި ދިރިއުޅެމުންދާއިރު، ސަރުކާރުގެ މި ނިންމުމާއެކު އެމީހުން އަނބުރާ ގައުމަށް ފޮނުވާލުމުގެ ބިރު މިހާރު ވަނީ ބޮޑުވެފައެވެ.

ޓްރަމްޕް ސަރުކާރުން ވަކާލާތު ކުރަމުންދަނީ، މި ހިމާޔަތަކީ ދާއިމީ ކަމަކަށް ވެގެން ނުވާނެ ކަމަށާއި، ގައުމުގެ ހާލަތު ރަނގަޅުވުމާއެކު އެމީހުން އެނބުރި ދާންޖެހޭނެ ކަމަށެވެ. ނަމަވެސް އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ބުނަމުންދަނީ ސޫރިޔާއަކީ އަދިވެސް ރައްކާތެރި ތަނެއް ނޫން ކަމަށާއި، މި ނިންމުމުގެ ސަބަބުން ގިނަ ބައެއްގެ ފުރާނައަށް ނުރައްކާވެދާނެ ކަމަށެވެ.

މި މައްސަލައަކީ ރައީސް ޓްރަމްޕްގެ ހަރުކަށި އިމިގްރޭޝަން ސިޔާސަތުގެ ދަށުން ކުރިއަށްގެންދާ މުހިންމު މަސައްކަތެކެވެ. މިކަމާ މެދު ސުޕްރީމް ކޯޓުން ވަކި ގޮތެއް ނިންމުމަށް ކުރިއަށް އޮތް މަސްތަކުގައި އަޑުއެހުންތައް ބާއްވާނެ ކަމަށް ބެލެވެ އެވެ.