ރާއްޖޭގައި މަސްތުވާތަކެތީގެ ވިޔަފާރި ފުޅާދާއިރާއެއްގައި ކުރަމުންދާ ފަރާތްތަކާ މެދު ގާނޫނީ ގޮތުން އެޅޭނެ އެންމެ ހަރުކަށި ފިޔަވަޅު އަޅުއްވާނެ ކަމަށް ހޯމް މިނިސްޓަރު އަލީ އިހުސާނު ވިދާޅުވެއްޖެ އެވެ.
ފުވައްމުލައް ސިޓީގައި މަސްތުވާތަކެތީގެ ވިޔަފާރިކުރާ ނެޓްވޯކަކަށް ނިސްބަތްވާ މީހަކަށް 75 އަހަރުގެ ޖަލު ހުކުމެއް އިއްވުމާ ގުޅިގެން، ފުލުހުންނާއި ޕްރޮސިކިއުޓަރުން ކުރެއްވި މަސައްކަތަށް ތައުރީފުކުރައްވަމުން މިނިސްޓަރު ވިދާޅުވީ، މަސްތުވާތަކެތީގެ ވަބާއިން ދިވެހި މުޖުތަމައު ސަލާމަތްކޮށް، ރައްޔިތުންނަށް އަމާން މުޖުތަމައެއް ގާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އެންމެ އިސްކަމެއް ދެއްވާ އެއް ސިޔާސަތު ކަމަށެވެ.
މި މައްސަލައިގައި 75 އަހަރުގެ ޖަލު ހުކުމެއް އިއްވާފައިވަނީ ފުވައްމުލައް ސިޓީއަށް ނިސްބަތްވާ އަބްދުލްބާސިތު (28 އަހަރު) ގެ މައްޗަށެވެ. އޭނާ ހައްޔަރުކޮށްފައިވަނީ 2024 އޭޕްރީލް 27 ގައި ފުލުހުން ހިންގި ހާއްސަ އޮޕަރޭޝަނެއްގަ އެވެ. އޭނާ ދިރިއުޅޭ ގެ ބަލައިފާސްކުރިއިރު ގިނަ އަދަދެއްގެ މަސްތުވާތަކެތި ފެނިފައިވާތީ، މަސްތުވާތަކެތި ޓްރެފިކް ކުރުމުގެ ދައުވާ ސާބިތުވެ އޭނާގެ މައްޗަށް ވަނީ މި ބޮޑު ހުކުމް އައިސްފަ އެވެ.
Advertisement
މަސްތުވާތަކެއްޗާ ދެކޮޅަށް ސަރުކާރުން ކުރައްވާ މަސައްކަތުގެ ދަށުން، ރާއްޖެއަށް މަސްތުވާތަކެތި އެތެރެކުރާ މަގުތައް ބަންދުކުރުމަށާއި، ރާއްޖޭގެ އެކި ސަރަހައްދުތަކުގައި ހިންގާ ޑްރަގް ނެޓްވޯކްތައް ރޫޅާލުމަށް ފުލުހުން ހާއްސަ އޮޕަރޭޝަންތަކެއް ފަށާފައިވާކަން މިނިސްޓަރު ފާހަގަކުރެއްވި އެވެ. އަދި މިފަދަ ނުރައްކާތެރި ކުށްތަކަށް އަރައިގަންނަ ފަރާތްތަކަށް އެއްވެސް ބެލުމެއް ނެތި، ގާނޫނުގައި އޮތް އެންމެ ހަރުކަށި އަދަބު ދިނުމަށް ފަސްނުޖެހޭނެ ކަމުގެ އިންޒާރު މިނިސްޓަރު ވަނީ ދެއްވާފަ އެވެ.
މަސްތުވާތަކެތީގެ ވިޔަފާރި ހުއްޓުވުމަށްޓަކައި ސަރުކާރުން ކުރަމުންދާ މަސައްކަތުގައި އެއްވެސް ފަރާތަކަށް އިސްތިސްނާއެއް ނޯންނާނެ ކަމަށާއި، ކުށްވެރިން އިންސާފުގެ ކުރިމައްޗަށް ގެނައުމުގައި ދައުލަތުގެ ކަމާބެހޭ ހުރިހާ މުއައްސަސާތަކެއް ގުޅިގެން މަސައްކަތް ކުރަމުންދާ ކަމަށްވެސް މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ، މަސްތުވާތަކެތީގެ މައްސަލައަކީ ގައުމީ ސަލާމަތަށް އޮތް ނުރައްކަލެއް ކަމަށްވާތީ، މިކަން ހައްލުކުރުމަށް ރައްޔިތުންގެ ފަރާތުން ލިބޭ އެއްބާރުލުން ބޭނުންވާ ކަމަށެވެ. އަދި މިފަދަ ވިޔަފާރިތަކުގައި ބައިވެރިވާ މީހުންނަށް މުޖުތަމައުގައި އެއްވެސް ޖާގައެއް ނޯންނާނެ ކަމަށްވެސް މިނިސްޓަރު ވިދާޅުވިއެވެ.
