ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ވިއްކާ ފިޔާ އަދި އަލުވީގެ އަގު މިއަދުން ފެށިގެން ހެޔޮކޮށްފިއެވެ. މިއީ ރޯދަމަހާ ދިމާކޮށް އާންމުކޮށް ބޭނުންކުރާ ކާބޯތަކެތީގެ ބާވަތްތަކުގެ އަގުތައް ކުޑަކޮށް، ރައްޔިތުންނަށް ލުއި ފަސޭހަކޮށްދިނުމަށް އެ ކުންފުނިން ނިންމި ނިންމުމެކެވެ.
އެސްޓީއޯއިން ނެރުނު ބަޔާނެއްގައި ވިދާޅުވީ، ކާބޯތަކެތީގެ އަސާސީ ބާވަތްތަކުގެ އަގުތައް ކޮންޓްރޯލްކޮށް އެއް ހަމައެއްގައި ބެހެއްޓުމަށާއި، ރައްޔިތުންނަށް ދަތިކަމެއް ނެތި އެ ތަކެތި ލިބޭނެ މަގު ފަހިކޮށްދިނުމަށް އެ ކުންފުނިން އަބަދުވެސް މަސައްކަތް ކުރަމުންދާ ކަމަށެވެ. އަގުތަކަށް ގެނައި ބަދަލާއެކު، މީގެ ކުރިން 12 ރުފިޔާއަށް ވިއްކި ފިޔާ ކިލޯއެއް މިހާރު 10 ރުފިޔާއަށް ވަނީ ހެޔޮކޮށްފައެވެ.
ފިޔާގެ އިތުރުން އަލުވީގެ އަގަށްވެސް ބޮޑެތި ބަދަލުތަކެއް ވަނީ ގެނެސްފައެވެ. އެގޮތުން ކުރިން 14 ރުފިޔާއަށް ލިބުނު އަލުވި ކިލޯއެއް މިހާރު 12 ރުފިޔާއަށް ލިބޭނެ ކަމަށް އެސްޓީއޯއިން މައުލޫމާތުދެއެވެ. މީގެ އިތުރުން ބަސްތާ ގަންނަ ފަރާތްތަކަށްވެސް ބޮޑު ލުޔެއް ވަނީ ދީފައެވެ.
އެސްޓީއޯއިން ހާމަކުރި ގޮތުގައި ފިޔާ ބަސްތާއެއްގެ އަގު ވަނީ 250 ރުފިޔާއިން 190 ރުފިޔާއަށް ކުޑަކޮށްފައެވެ. އަދި އަލުވި ބަސްތާއެއްގެ އަގު 300 ރުފިޔާއިން 160 ރުފިޔާއަށް ވަނީ ބޮޑުތަނުން ހެޔޮކޮށްފައެވެ. މި ބަދަލާއެކު ބާޒާރުގައި މި ތަކެތީގެ އަގުތައް އެއްވަރެއްގައި ހިފެހެއްޓިގެންދާނެ ކަމަށް ބެލެވެއެވެ.
އެސްޓީއޯއިން އެތެރެކުރާ އަސާސީ ކާބޯތަކެތީގެ ބާވަތްތައް އާންމުންނަށް ވަކިން ގަންނަން ލިބޭނީ އެސްޓީއޯ ޕީޕަލްސް ޗޮއިސްގެ ފިހާރަތަކުންނެވެ. އަދި ގަނޑުކޮށް މި ތަކެތި ބޭނުންވާ ވިޔަފާރިވެރިންނަށާއި ފަރާތްތަކަށް އެސްޓީއޯގެ ހޯލްސޭލް ސެންޓަރުތަކުން މި ތަކެތި ލިބޭނެ އިންތިޒާމު ވަނީ ހަމަޖެހިފައެވެ.
