ރަމަޟާން މަހަށް ހާއްސަކޮށް "އަވަސްވެގަންނާށެވެ! 1447" ޕްރޮގްރާމް އައްސޭރި ޖަލުގެ ގައިދީންނަށް ފަށައިފި އެވެ.
މޯލްޑިވްސް ކަރެކްޝަނަލް ސާވިސް އިން ބުނީ މި ޕްރޮގްރާމަކީ މައިގަނޑު 6 މާއްދާ އާއި ހަރަކާތްތަކަށް އެކުލެވޭ ޕްރޮގްރާމެއް ކަމަށެވެ.
އަދި މި ޕްރޮގްރާމްގެ މަގްސަދަކީ ގައިދީން ރަމަޟާން މަހަށް ފުރިހަމަ ގޮތުގައި އިސްތިގްބާލުކުރުވުމާއި އެ މައްސަރުގެ ބޭނުން އެންމެ އެދެވޭ ގޮތުގައި ހިފުމަށް ބާރުއެޅުމާއި، އިސްލާމް ދީނާއި ކީރިތި ގުރުއާނަށް ލޯބިކުރާ ބަޔަކަށް ވުމަށް ބާރުއެޅުން ކަމަށް ބުންޏެވެ.
އަދި މީގެ އިތުރުން މި ޕްރޮގްރާމް މެދުވެރިކޮށް ބައިވެރިންނަށް އިސްލާމް ދީންގެ އަސާސީ މައުލޫމާތު ފޯރުކޮށްދިނުމާއި އިސްލާމީ ރިވެތި ސިފަތަކާއި އުސޫލުތަކާ އެއްގޮތަށް އަހްލާގާއި ސުލޫކަށް ބަދަލު ގެނައުމަށް ބާރުއަޅާނެކަމަށް ވެސް ކަރެކްޝަންސް އިން ވަނީ ބުނެފަ އެވެ.
ފަސް ހަފްތާގެ މުއްދަތަށް ކުރިއަށްގެންދާ މި އަހަރުގެ ޕްރޮގްރާމްގައި ޖުމްލަ 92 ގައިދީން ބައިވެރިވެފައިވެ އެވެ.
މޯލްޑިވްސް ކަރެކްޝަނަލް ސާވިސްގެ ޖަލުތަކުގައި މި އަހަރު ވަނީ ފުރަތަމަ ފަހަރަށް ތަރާވީސް ނަމާދު ކުރަން ވެސް ފަށާފައެވެ.
