ކުރިއަށް އޮތް ލޯކަލް ކައުންސިލް އިންތިހާބުގައި ވޯޓުލާން އެކަށީގެންވާ އަދަދަކަށް މީހުން ރީ-ރަޖިސްޓްރީކޮށްފައި ނުވާތީ، ސިނާއީ ސަރަހައްދުތަކާއި ރާއްޖެއިން ބޭރުގެ އެއްވެސް ގައުމެއްގައި ވޯޓުފޮށި ނުބަހައްޓަން އިލެކްޝަންސް ކޮމިޝަނުން ނިންމައިފިއެވެ.
އިލެކްޝަންސް ކޮމިޝަންގެ ނައިބު ރައީސް އަބްދުއްރަހްމާން ސޮލާހު ރަޝީދު ޕީއެސްއެމްއަށް ދެއްވި އިންޓަވިއުއެއްގައި ވިދާޅުވީ، ރީ-ރަޖިސްޓްރީކުރުމުގެ މުއްދަތު މިދިޔަ އާދިއްތަ ދުވަހު ހަމަވިއިރު ފޯމު ހުށަހަޅާފައިވަނީ ޖުމްލަ 26,454 މީހުން ކަމަށެވެ. މީގެ ތެރެއިން ރަށްރަށާއި މާލޭގައި ވޯޓުލާން 24,429 މީހުން ރަޖިސްޓްރީވެފައިވާއިރު، ޖަލުތަކުގައި ވޯޓުލާން 1,326 މީހުން ވަނީ ރަޖިސްޓްރީވެފައެވެ.
ރާއްޖެއިން ބޭރުގެ ގައުމުތަކަށް ބަލާއިރު، މެލޭޝިޔާގައި ވޯޓުލާން 499 މީހުން އަދި ސްރީލަންކާގައި ވޯޓުލާން 189 މީހުން ރަޖިސްޓްރީވެފައިވެއެވެ. ނަމަވެސް، ރާއްޖެއިން ބޭރުގައި ވޯޓުފޮށި ބަހައްޓާނީ އެ ގައުމަކަށް ވޯޓުލާން މަދުވެގެން 2,000 މީހުން ރަޖިސްޓްރީވެ، މަދުވެގެން އެއް ދާއިރާއަކުން 40 މީހުން ހަމަވާނަމަ ކަމަށްވާތީ، އެއްވެސް ގައުމެއްގައި ފޮށި ބެހެއްޓޭ ވަރަށް އަދަދު ހަމަވެފައެއް ނުވެއެވެ.
ސިނާއީ މަސައްކަތްކުރާ ތަންތަނުގައި ވޯޓުފޮށި ބެހެއްޓުމަށް މަދުވެގެން 30 މީހުން ރަޖިސްޓްރީވާން ޖެހޭއިރު، ގިނަ އަދަދެއްގެ ދިވެހިން މަސައްކަތްކުރާ ހުޅުލޭ އެއާޕޯޓުގައި ވެސް ރަޖިސްޓްރީވެފައިވަނީ އެންމެ 11 މީހުންނެވެ. ސޮލާހު ވިދާޅުވި ގޮތުގައި ރީ-ރަޖިސްޓްރޭޝަނަށް 30 މީހުން ހަމަވީ އެންމެ 21 ރިސޯޓުގައެވެ.
އީސީން މިއަދު ކުރި އިއުލާނުގައި ބުނެފައިވަނީ، ވޯޓުފޮށި ނުބަހައްޓަން ނިންމި ތަންތަނަށް ވޯޓުލާން ރަޖިސްޓްރީކުރި މީހުންނަށް އެހެން ފޮއްޓަކަށް ރީ-ރަޖިސްޓްރީވުމުގެ ފުރުސަތު ދޭނެ ކަމަށެވެ. އަދި އެ މުއްދަތުގައި ރަޖިސްޓްރީ ނުކުރާ މީހުން ވޯޓުލާން ރަޖިސްޓްރީވެފައި އޮންނާނީ އެ މީހަކު ރަށްވެހިވެފައިވާ ރަށެއްގައި ކަމަށް ވެސް އެ ކޮމިޝަނުން ބުނެފައިވެއެވެ.
ކައުންސިލު އިންތިހާބާއި، މައި ދެ އިންތިހާބު އެއްކޮށްލުމާ މެދު އާންމުންގެ ހިޔާލު ހޯދުމުގެ ވޯޓު ނެގުން އޮތީ އަންނަ އޭޕްރިލް މަހުގެ ހަތަރުވަނަ ދުވަހުގެ ހެނދުނު އަށަކުން ފެށިގެން ހަވީރު ހަތަރެއް ޖެހުމާ ހަމައަށެވެ.
