މާލޭގެ މަގަކުން ދަތުރުކުރި އެމްބިއުލާންސަކަށް ޖާގަ ނުދީ، މުދާ ބާލަން އޮތް ޕިކަޕެއްގެ މައްސަލަ ކަމާބެހޭ އިދާރާތަކުން ބަލަން ފަށައިފިއެވެ.

ސޯޝަލް މީޑިއާގައި އާންމުވެފައިވާ ވީޑިއޯއަކުން ފެންނަ ގޮތުގައި، ބަލި މީހަކު ގޮވައިގެން ދިޔަ އެމްބިއުލާންސެއް ސައިރެން އަޅަމުން ދިޔައިރުވެސް، މަގު ބަންދުވާ ގޮތަށް އޮތް ޕިކަޕަކުން ދިޔައީ މުދާ ބާލަމުންނެވެ.

އެ ވީޑިއޯއިން ފެންނަ ގޮތުގައި، ޕިކަޕް މަގު މެދަށް ހުއްޓައިގެން މުދާ ބާލަމުން ދިއުމުގެ ސަބަބުން އެހެން ވެހިކަލްތައް ވެސް އޮތީ ޓްރެފިކްގައި ތާށިވެފައެވެ. އެމްބިއުލާންސްގެ ސައިރެންގެ އަޑު މުޅި ސަރަހައްދުގައި ގަދައަށް އިވެމުންދިޔަ ނަމަވެސް، ޕިކަޕް ދުއްވަން ހުރި މީހާ އަދި މުދާ ބާލަން ތިބި މީހުން އެކަމަށް އެއްވެސް ސަމާލުކަމެއް ދީފައެއް ނުވެއެވެ. އެ ޕިކަޕް އެ ތަނުން ދިޔައީ މުދާ ބާލައި އެއްކޮށް ނިމުމުންނެވެ.

ކުއްލި ނުރައްކަލުގެ ހާލަތްތަކުގައި ދުއްވާ އުޅަނދުފަހަރަށް މަގު ނުދީ ހުރަސްއެޅުމަކީ ގާނޫނީ ގޮތުން ފިޔަވަޅު އެޅޭނެ ކަމެކެވެ. ޓްރާންސްޕޯޓް މިނިސްޓްރީގެ އިތުރުން ފުލުހުން ވެސް ދަނީ މި މައްސަލަ ތަހުގީގުކުރަމުންނެވެ.

މަގުމަތީގެ ސަލާމަތާއި ރައްކާތެރިކަމަށް އިސްކަންދީ، ހާއްސަކޮށް އެމްބިއުލާންސް ފަދަ އިމަޖެންސީ އުޅަނދުފަހަރަށް އިސްކަން ދިނުމަކީ އާންމު ފަރުދުންގެ ޒިންމާއެއްކަން ކަމާބެހޭ އިދާރާތަކުން އަބަދުވެސް ހަނދާންކޮށްދެ އެވެ. މި ހާދިސާއާ ގުޅިގެން ސޯޝަލް މީޑިއާގައި ގިނަ ބަޔަކު ދަނީ އެ ޕިކަޕްގެ ޑްރައިވަރުގެ އަމަލު ކުށްވެރިކޮށް، ހަރުކަށި ފިޔަވަޅު އެޅުމަށް ގޮވާލަމުންނެވެ.