ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ އިތުރުން، ރައްޔިތުންގެ ހިޔާލު ހޯދުމުގެ އާންމު ވޯޓުގައި ބައިވެރިވުމަށްޓަކައި ރީ-ރަޖިސްޓްރީވުމަށް އިލެކްޝަންސް ކޮމިޝަން (އީސީ) އިން ދިން އެންމެ ފަހު ފުރުސަތު މާދަމާ ހަމަވާނެ އެވެ.

ދެ އިންތިހާބު އެއްކޮށްލައިގެން އަންނަ އޭޕްރިލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާއިރު، މިހާރު ރަޖިސްޓަރީވެފައިވާ ތަން ނޫން އެހެން ތަނަކަށް ވޯޓުލާން ބޭނުންވާ ފަރާތްތަކަށް އީސީން ވަނީ މާދަމާ (އާދީއްތަ ދުވަސް) މެންދުރުފަހު 3:00 އާ ހަމައަށް ފުރުސަތު ހުޅުވާލާފަ އެވެ.

މީގެ ކުރިން އީސީން ދިން ރީ-ރަޖިސްޓްރޭޝަންގެ މުއްދަތު މިދިޔަ ހޯމަ ދުވަހަށް ވަނީ ހަމަވެފައެވެ. ނަމަވެސް، އިތުރު ފުރުސަތަކަށް އެދެމުންދާތީ ކޮމިޝަނުން ވަނީ މި މުއްދަތު އިތުރުކޮށްދީފަ އެވެ. މި މުއްދަތުގައި ރަޖިސްޓަރީވުމަށް އެދި ހުށަހަޅަންޖެހޭނީ ހަމައެކަނި މިހާރު ވޯޓުލުމަށް ރަޖިސްޓަރީވެފައިވާ ތަން ބަދަލުކުރަން ބޭނުންވާ ފަރާތްތަކުން އެކަންޏެވެ.

ވޯޓުލާން ރަޖިސްޓަރީވެފައިވާ ތަނުގެ މައުލޫމާތު ސާފުކުރުމަށްޓަކައި VR (space) IDNO ޖެހުމަށްފަހު 1414 އަށް އެސްއެމްއެސް ކޮށްގެން ނުވަތަ އިލެކްޝަންސް ކޮމިޝަނުގެ އޮންލައިން ރަޖިސްޓްރީ ޕޯޓަލް މެދުވެރިކޮށް ޗެކް ކުރެވޭނެ އެވެ.

ރީ-ރަޖިސްޓްރީ ވުމަށް އެދި ހުށަހަޅަންޖެހޭނީ އީސީގެ 'ރީ-ރަޖިސްޓްރޭޝަން ޕޯޓަލް' ނުވަތަ 'މައި ޕޯޓަލް' މެދުވެރިކޮށް އޮންލައިންކޮށެވެ.

ކުރިއަށް އޮތް އިންތިހާބުތަކަކީ ރާއްޖޭގެ އިދާރީ ދާއިރާތަކުގެ ހިންގުމަށާއި، ރައްޔިތުންގެ ނިންމުންތަކަށް ނުހަނު މުހިންމު އިންތިޚާބުތަކަކަށް ވާއިރު، ވޯޓުލުމުގެ ހައްގު ލިބިފައިވާ ހުރިހާ ފަރާތްތަކުންވެސް ރަޖިސްޓްރީވެފައިވާ ތަން ކަށަވަރުކުރުމަށް އިލެކްޝަންސް ކޮމިޝަނުން ވަނީ އިލްތިމާސްކޮށްފަ އެވެ.