ދުނިޔޭގެ ގައުމުތަކާއި ދެކޮޅަށް އެކި ލެލެވްގައި އެމެރިކާގެ ރައީސް ޑޮނަލްޑް ޓްރަމްޕް އެޅި ޓެރިފްގެ ފިޔަވަޅުތަކަކީ އޭނާ އެޅުއްވި ޣައިރު ގާނޫނީ ފިޔަވަޅުތަކެއް ކަމަށް އެމެރިކާގެ ސްޕްރީމް ކޯޓުން ނިންމުމުން، އެ ނޫން އެހެން ގޮތަކުން ވެސް އެކަން ކުރާނެ ކަމަށް ބުނެ އެމެރިކާގެ ސުޕްރީމް ކޯޓަށް ޓްރަމްޕް ގޮންޖަހައިފިއެވެ.

ހުކުރު ދުވަހު އެމެރިކާގެ ސުޕްރީމް ކޯޓުގެ ނުވަފަނޑިޔާރުންގެ ތެރެއިން ހަފަނޑިޔާރުން ނިންމެވީ އެމެރިކާއަށް އެތެރެކުރާ މުދަލުން ޓެރިފް ނެގުމަށް ޓްރަމްޕްގެ ސަރުކާރުން އެޅި ފިޔަވަޅުތަކަކީ ކޮންގްރެސް ގެ ހުއްދަނެތި އެމެރިކާގެ ރައީސަކަށް އެޅޭނެ ފިޔަވަޅުތަކެއް ނޫން ކަމުގައެވެ. މި ފަނޑިޔާރުންގެ ރަޢްޔުގައި ޙަވާލާ ދީފައި ވަނީ 1977 ވަނަ އަހަރު ފާސްކުރި ކުއްލި ޙާލަތުގެ ޤާނޫނެއްގެ ދަށުން އޭނާގެ ބާރު ފަހަނައަޅައި ގޮސްފައިވާ ކަމަށާއި އެފަދަ އިމްޕޯޓް ޓެކްސް ނެގޭނީ ހަމައެކަނި ކޮންގްރެސް އަށް ކަމަށް ބުނެފައެވެ.

ޓްރަމްޕް ވަނީ ސުޕްރީމް ކޯޓުގެ އެ ހުކުމަކީ މަލާމާތުގެ ހުކުމެއް ކަމަށް ބުނެ، ފަނޑިޔާރުންނަށް ފާޑު ކިޔާފައެވެ. އޭނާ ބުނީ ތިމަންނާގެ އެޖެންޑާ ދޫކޮށްނުލާނެ ކަމަށާއި ފަނޑިޔާރުންގެ އެ ނިންމުމުގެ ބަދަލުގައި 150 ދުވަހުގެ މުއްދަތަށް 10 އިންސައްތައިގެ ޓެރިފް ނަގާނެ ކަމަށެވެ. އެއީ 1974 ވަނަ އަހަރުގެ ވިޔަފާރީގެ ގާނޫނުގެ 122 ވަނަ މާއްދާގެ ދަށުންނެވެ.

އެ މާއްދާގައި ބުނަނީ ވަކި ގައުމެއް އިސްތިސްނާނުވާހެން 10 އިންސައްތައަށް ވުރެ މަތިނުވާ ގޮތަކަށް ހުރިހާ ގައުމެއް ހަމަމަވާގޮތަށް އިމަޖެންސީ ހާލަތެއްގައި 10 އިންސައްތައަށް ވުރެ މަތި ނުވާނެހެން ޓެރިފް ނެގޭނެ ކަމަށެވެ.