ޖެފްރީ އެޕްސްޓައިންއާ އޮތް ގުޅުންތަކުގެ މައްސަލަ އަލުން ހޫނުވެފައިވާ ދަނޑިވަޅެއްގައި، އިންޑިއާގެ ވެރިރަށް ދިއްލީގައި ބާއްވާ "އިންޑިއާ އޭއައި އިމްޕެކްޓް ސަމިޓް" އިން ބިލް ގޭޓްސް ވަކިވެއްޖެ އެވެ.
މި ސަމިޓުގައި ބިލް ގޭޓްސް ދެއްވުމަށް ހަމަޖެހިފައިވާ މައިގަނޑު ތަގުރީރު ކެންސަލްކޮށްފައިވާކަން އޭނާގެ ފަލްސަފީ ޖަމްއިއްޔާއިން ހާމަކޮށްފައި ވަނީ، އޭނާ ވާހަކަދެއްކެވުމަށް ހަމަޖެހިފައި އޮތް ވަގުތުގެ މަދު ގަޑިއިރުތަކެއް ކުރިންނެވެ. ގޭޓްސް ފައުންޑޭޝަނުން ބުނި ގޮތުގައި، މި ނިންމުމަކީ ވަރަށް ބޮޑަށް ވިސްނުމަށްފަހު ނިންމި ނިންމުމެކެވެ. އަދި މިއީ ސަމިޓުގެ މައިގަނޑު މަގްސަދުތަކަށް ދޭންޖެހޭ ސަމާލުކަން އެއްވެސް މެދުކެނޑުމެއްނެތި ލިބިދިނުމަށްޓަކައި ނިންމި ނިންމުމެއް ކަމަށްވެސް އެ ފައުންޑޭޝަނުން ބުންޏެވެ.
ބިލް ގޭޓްސް މި ސަމިޓުން ވަކިވެފައި ވަނީ، އެޕްސްޓައިން އާއި އޮތް ގުޅުންތަކުގެ ވާހަކަ އަލުން ފެންމަތިވެފައިވާ ދަނޑިވަޅެއްގަ އެވެ. މިދިޔަ ޖެނުއަރީ މަހު އެމެރިކާގެ ޑިޕާޓްމަންޓް އޮފް ޖަސްޓިސް އިން އާންމުކުރި އާ ލިޔެކިޔުންތަކެއްގައި ބިލް ގޭޓްސްގެ ނަން ވަނީ ހިމެނިފަ އެވެ. ނަމަވެސް ގޭޓްސްގެ ތަރުޖަމާނު ވަނީ އެ ލިޔުންތަކުގައިވާ ތުހުމަތުތަކަކީ "ކަޑައެޅިގެން ދޮގު" ތަކެއް ކަމަށް ސިފަކޮށްފަ އެވެ. މީގެ ކުރިން ބިލް ގޭޓްސް ވެސް ވަނީ އެޕްސްޓައިން އާއިއެކު ވަގުތު ހޭދަކުރެވުނީތީ ވަރަށް ބޮޑަށް ހިތާމަކުރާ ކަމަށް ބުނެފަ އެވެ.
Advertisement
ފާހަގަކޮށްލެވޭ ގޮތުގައި، އެޕްސްޓައިންގެ ޝިކާރައަކަށްވި އެއްވެސް މީހަކު ބިލް ގޭޓްސްގެ މައްޗަށް އެއްވެސް ނުރަނގަޅު އަމަލެއްގެ ތުހުމަތު ކޮށްފައެއް ނުވެ އެވެ. އަދި އެ ލިޔުންތަކުގައި އޭނާގެ ނަން އޮތުމަކީ އޭނާ އެއްވެސް ޖިނާއީ ކުށެއްގައި ބައިވެރިވި ކަމުގެ ހެއްކެއް ނޫނެވެ.
ގޭޓްސް ފައުންޑޭޝަނުން ހާމަކުރި ގޮތުގައި، ބިލް ގޭޓްސްގެ ބަދަލުގައި މި ސަމިޓުގައި ވާހަކަދައްކަވާނީ އެ ފައުންޑޭޝަންގެ އެފްރިކާ އަދި އިންޑިއާ ގޮފީގެ ރައީސް އަންކޫރް ވޯރާ އެވެ. ބިލް ގޭޓްސް މިހާރުވެސް ހުރީ އިންޑިއާގައެވެ. އޭނާ ވަނީ މިދިޔަ ހޯމަ ދުވަހު އަންދުރަ ޕްރަދޭޝްއަށް ޒިޔާރަތްކޮށް، ސިއްހަތާއި، ދަނޑުވެރިކަމާއި، ތަޢުލީމު އަދި ޓެކްނޮލޮޖީ ކުރިއެރުވުމާ ގުޅޭގޮތުން މަޝްވަރާ ކޮށްފަ އެވެ.
ބިލް ގޭޓްސް ފަދަ ދުނިޔޭގެ ނުފޫޒުގަދަ ޝަހްސިއްޔަތަކު މި ސަމިޓުން ވަކިވުމަކީ އިންޑިއާއަށް ލިބުނު އުނިކަމެކެވެ. ސަބަބަކީ މި ސަމިޓަކީ އިންޑިއާ އަކީ ދުނިޔޭގެ އޭއައި ހަބަކަށް ހެދުމަށްޓަކައި އެ ޤައުމުން އިސްނަގައިގެން ބާއްވާ އެންމެ ބޮޑު އެއް ބައްދަލުވުމަށް ވާތީ އެވެ. ފަސްދުވަހުގެ މުއްދަތަށް ކުރިއަށްދާ މި ސަމިޓުގައި 100 އަށްވުރެ ގިނަ ގައުމުގެ މަންދޫބުން ބައިވެރިވެ އެވެ.
ބިލް ގޭޓްސް ބައިވެރިނުވި ނަމަވެސް، އޯޕަން އޭއައިގެ ވެރިޔާ ސޭމް އޯލްޓްމަން ވަނީ މި ސަމިޓުގައި ވާހަކަދައްކަވާފަ އެވެ. އޭނާ ބުނީ އޭއައިގެ ސަބަބުން އިންސާނިއްޔަތަށް ކުރިއެރުން ލިބޭނީ އޭގެ ބޭނުން ހުރިހާ އެންމެންނަށް ހަމަހަމައަށް ލިބިދީގެން ކަމަށެވެ. އަދި މި ޓެކްނޮލޮޖީ ވަކި ބައެއްގެ އަތްމަތީގައި އޮތުމަކީ ނުރައްކަލެއް ކަމަށާއި، މިކަމަށް ވަރުގަދަ ޤަވާއިދުތަކެއް ބޭނުންވާ ކަމަށްވެސް އޭނާ ބުންޏެވެ.
މީގެ އިތުރުން، އިންޑިއާގެ ބޮޑުވަޒީރު ނަރެންދުރަ މޯދީ އާއި ފަރަންސޭސި ރައީސް އެމަނުއަލް މެކްރޯން ވެސް ވަނީ އޭއައިގެ ބޭނުން އާންމު ކުރުމަށާއި، އެކަމުގައި ހުރިހާ ޤައުމަކުން ގުޅިގެން މަސައްކަތް ކުރުމަށް ގޮވާލައްވާ ފައެވެ.
