މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައިވާ ޖަލުތަކުގެ މިސްކިތްތަކުގައި، ތާރީހުގައި ފުރަތަމަ ފަހަރަށް ރަސްމީކޮށް ތަރާވީސް ނަމާދުކުރުމަށް ނިންމައިފި އެވެ.
މިކަން ހާމަކޮށްފައިވަނީ ކަރެކްޝަނަލް ސާވިސްއިން އިއްޔެ އެކްސްގައި ކުރި ޕޯސްޓެއްގައެވެ.
ކަރެކްޝަނުން ބުނި ގޮތުގައި، ޖަލުތަކުގައި ބަންދުކޮށްފައި ތިބޭ ގައިދީންނާއި ބަންދު މީހުންނަށް ދީނީ ސެޝަންތައް ކުރިއަށް ގެންދިއުމަށާއި ތަރާވީސް ނަމާދު ކުރުމަށްޓަކައި މިހާރު ވަނީ ހާފިޒުން ހަމަޖައްސައިފަ އެވެ. މި ނިންމުމަކީ ޖަލުތަކުގައި ތިބޭ ފަރާތްތަކަށް ދީނީ ކަންކަމަށް ފުރުސަތު ފަހިކޮށްދިނުމުގެ ގޮތުން ނިންމި ނިންމުމެކެވެ.
މިހާރު ކަރެކްޝަނުން ބަލަހައްޓަމުން ގެންދަނީ ޖުމުލަ ތިން ޖަލެކެވެ. އެއީ ހުޅުމާލޭ ޖަލާއި، ކ. މާފުށީ ޖަލުގެ އިތުރުން އެ އަތޮޅު ހިންމަފުށީގައި ހުންނަ އައްސޭރި ޖަލެވެ. މި ހުރިހާ ޖަލެއްގައި ވެސް ރަމަޟާން މަހުގެ ހަރަކާތްތައް ކުރިއަށް ގެންދިއުމަށް ވަނީ ރޭވިފަ އެވެ.
މި ރަމަޟާން މަހާ ދިމާކޮށް، އިސްލާމިކް މިނިސްޓްރީއާ ގުޅިގެން މާފުށީ ޖަލާއި އައްސޭރި ޖަލުގެ އޮފިސަރުންނަށް ދީނީ ނަސޭހަތް ދިނުމުގެ ސެޝަންތަކެއް ވެސް ވަނީ ކުރިއަށް ގެންގޮސްފަ އެވެ. މިއީ އޮފިސަރުންގެ ދީނީ ހޭލުންތެރިކަން އިތުރުކުރުމަށް ކުރެވޭ މަސައްކަތުގެ ބައެކެވެ.
މީގެ އިތުރުން، ހުޅުމާލެ ޖަލުގެ ގައިދީންނަށް އާއިލާތަކާއެކު ވަގުތު ހޭދަކުރުމުގެ ފުރުސަތު ދިނުމުގެ ގޮތުން މި މަހުގެ 15 ވަނަ ދުވަހު ވަނީ ހާއްސަ ހަފުލާއެއް ބާއްވާފަ އެވެ. އެމްސީއެސްގެ އާ ހެޑްކުއާޓާސް އިމާރާތް ކުރުމުގައި އަމަލީ ގޮތުން ބައިވެރިވި ގައިދީންގެ އަގު ވަޒަންކޮށް، އެ ފަރާތްތަކަށް މި ހަފުލާގައި ވަނީ ހަނދާނީ ލިޔުން ވެސް ހަވާލުކޮށްފަ އެވެ.
