މި ރަމަޟާން މަހު މާލެ ސަރަހައްދުގައި މުދާ އުފުލުމަށް ބޭނުންކުރާ އުޅަނދުތަކާއި ބަރު އުޅަނދުތައް ދުއްވުމާއި މުދާ އުފުލުން މަނާ ގަޑިތައް ކަނޑައަޅައިފި އެވެ.

ޓްރާންސްޕޯޓް މިނިސްޓްރީގެ މި ނިންމުމަކީ 1447 ވަނަ އަހަރުގެ ރަމަޟާންމަހާއި ޝައްވާލް މަހުގެ ފުރަތަމަ ހަތް ދުވަހަށް އަމާޒުކޮށް ނިންމާފައިވާ ނިންމުމެކެވެ.

މިނިސްޓްރީން ހާމަކޮށްފައިވާ ގޮތުގައި، ރަމަޟާންމަހުގެ 1 ވަނަ ދުވަހުން ފެށިގެން 19 ވަނަ ދުވަހުގެ ނިޔަލަށް، އަދި ޝައްވާލުމަހުގެ 1 އިން 7 ވަނަ ދުވަހުގެ ނިޔަލަށް ހެނދުނު 8:00 އިން 9:30 އަށް އަދި ހަވީރު 16:30 އިން ރޭގަނޑު 20:00 އަށް މުދާ އުފުލުމަކީ މަނާކަމެކެވެ.

މީގެ އިތުރުން، ރަމަޟާން މަހުގެ ފަހު ދިހައެއްގެ ދުވަސްތަކަށްވެސް ވަކި އުސޫލެއް ވަނީ ކަނޑައަޅާފަ އެވެ. އެގޮތުން ރަމަޟާން މަހުގެ 20 ވަނަ ދުވަހުން ފެށިގެން މަސް ނިމެންދެން، ކޮންމެ ދުވަހަކު ހަވީރު 16:30 އިން ރޭގަނޑު 20:00 އަށް ބަރު އުޅަނދު ދުއްވުމާއި މުދާ އުފުލުން މަނާވާނެ ކަމަށް މިނިސްޓްރީން ބުންޏެވެ.

މި އުސޫލާ ހިލާފުވާ ފަރާތްތަކާމެދު ހަރުކަށި ފިޔަވަޅު އެޅުމަށް ވަނީ ނިންމާފަ އެވެ. މިނިސްޓްރީން ބުނީ، ކަނޑައެޅިފައިވާ ގަޑިތަކާ ހިލާފަށް މުދާ އުފުލާ ފަރާތްތައް އެއްގަމު ދަތުރުފަތުރުގެ ގާނޫނުގެ ދަށުން -/750 ރުފިޔާއިން ޖޫރިމަނާކުރެވޭނެ ކަމަށެވެ. އެހެންކަމުން ހުރިހާ ފަރާތްތަކުންވެސް މި އުސޫލަށް ފުރިހަމައަށް ބޯލެނބުމަށް އެ މިނިސްޓްރީން ވަނީ އިލްތިމާސްކޮށްފަ އެވެ.

ކޮންމެ އަހަރެއްގެވެސް ރަމަޟާންމަހާ ދިމާކޮށް މިފަދަ އުސޫލުތައް ކަނޑައަޅަނީ މާލޭ ސަރަހައްދުގެ މަގުތަކުގެ ތޮއްޖެހުން ކުޑަކުރުމަށާއި، އާންމު ރައްޔިތުންނަށް މަގުމަތި ބޭނުންކުރުމުގައި ލުއިފަސޭހަކޮށްދިނުމުގެ މަގުސަދުގަ އެވެ. މި ފިޔަވަޅުގެ ސަބަބުން ރަމަޟާން މަހުގެ ހަވީރު ވަގުތުތަކުގައި މަގުމަތީގެ ކާރޫބާރޫ ކުޑަވެގެންދާނެ ކަމަށް ބެލެވެ އެވެ.