އެސްޓީއޯގެ އައުޓްލެޓްތަކުން މިރޯދަ މަހު އަސާސީ ކާބޯތަކެތީގެ 26 ބާވަތެއް އަގު ހެޔޮކޮށް ލިބޭނެކަމަށް އެކޮނޮމިކް މިނިސްޓްރީން ބުނެފި އެވެ.

އެކޮނޮމިކް މިނިސްޓްރީން ސޯޝަލް މީޑިއާގައި ހިއްސާ ކުރި ޕޯސްޓެއްގައި ބުނެފައި ވަނީ، އަސާސީ ކާބޯތަކެތީގެ ލިސްޓަށް އިތުރުކުރި 23 ބާވަތް ހިމެނޭހެން 26 ބާވަތެއް، މިރަމަޟާން މަހު އެސްޓީއޯގެ އައުޓުލެޓްތަކުން ހެޔޮ އަގުގައި ލިބޭނެކަމަށެވެ. އަދި މިނިސްޓްރީން އާއްމު ކުރި އަސާސީ ކާބޯތަކެތީގެ ލިސްޓުގައި މޭވާ އާއި ތަރުކާރީގެ އިތުރުން، ކާބޯތަކެތީގެ އިތުރު ބާވަތްތަކެއް ވެސް ވަނީ ހިމަނާފަ އެވެ.

އެގޮތުން މޭވާގެ ބާވަތްތަކުގެ ތެރޭގައި ދޮންކެޔޮ، އާފަލު، އޮރެންޖު، ލުނބޯ، ޖުމްހޫރީމޭވާ، އަނބު، ފަޅޯ، ކަރާ އަދި މިރުހުގެ އިތުރުން މޭބިސްކަދުރު ހިމެނެ އެވެ.

އަސާސީ ކާބޯތަކެތީގެ ލިސްޓުގައި ހިމެނޭ ތަރުކާރީގެ ބާވަތްތަކަށް ބަލާ އިރު ރަތް ފިޔާ، އިނގުރު، ކެރެޓު އަދި ބަށި ހިމެނެވެ. އޭގެ އިތުރުން ކައްޓަލަ، ލޮނުމެދު، އަލުވި، ކެބެޖު ބަރަބޯ އަދި ބޯވެލި، ތަރުކާރީގެ ގޮތުގައި އަގުހެޔޮކޮށް ލިބޭނެ އެވެ. އެސްޓީއޯއިން އަގުހެޔޮކޮށް ލިބޭ އިތުރު ބާވަތްތަކުގެ ތެރޭގައި ރީނދޫ މުގާއި ކުކުޅު ބިސް އަދި ކާށި ފަދަ ތަކެތި ލިބޭނެ އެވެ.

އެ 26 ބާވަތެއްގެ އަސާސީ ކާބޯތަކެތި މާލެގެ އިތުރުން އަތޮޅުތެރޭގައި ހުންނަ އެސްޓީއޯގެ އައުޓުލެޓުތަކުން ލިބެން ހުންނާނެ ކަމަށް އެކޮނޮމިކް މިނިށްޓްރީން ބުންޏެވެ. އޭގެ އިތުރުން މިފެށޭ ރަމަޟާންމަހުގެ ކުރިން ހުޅުމާލޭގައި ހުޅުވުމަށް ތައްޔާރުވަމުން އަންނަ އެސްޓީއޯ ޕީޕަލްސް ޗޮއިސްއިންވެސް މިތަކެތި ހެޔޮ އަގުގައި ލިބޭނެ އެވެ.

މާލެ ސަރަހައްދުގައި އަސާސީ ކާބޯތަކެތި ލިބެން ހުންނަ އެސްޓީއޯގެ އައުޓްލެޓްތައް:

• އެސްޓީއޯ ޕީޕަލްސް ޗޮއިސް،މާލެ

• އެސްޓީއޯ ހޯލްސޭލް، ނޯތު ހާބަރު

• އެސްޓީއޯ އިންޑަސްޓްރިއަލް ވިލެޖް

• އެސްޓީއޯ ވިލިމާލެ ފިހާރަ

އޭގެ އިތުރުން އެކޮނޮމިކް މިނިސްޓްރީން ބުނެފައި ވަނީ، އަސާސީ ކާބޯތަކެތީގެ ލިސްޓަށް 23 ބާވަތެއް އިތުރުކުރަން ނިންމީ، އެ ބާވަތްތަކުން ލިބޭ ސިއްހީ ފައިދާތަކަށް ބަލާފައިކަމަށެވެ. އަދި މި ބާވަތްތައް ލިސްޓު ކުރީ ރާއްޖެއަށް އެންމެ ގިނައިން އެތެރެކުރާ ކާބޯތަކެތީގެ ބާވަތްތަކާއި ގޭގޭގައި ކެއިން ބުއިމަށް ބޭނުންކުރާ މިންވަރަށް ވެސް ބަލާފައި ކަމަށް މިނިސްޓްރީން ބުންޏެވެ.