ވައިޓް ހައުސް އިން ކުރިއަށް ގެންދާ “ބޯޑް އޮފް ޕީސް” ގައި އޮބްޒާވަރެއްގެ ގޮތުގައި އިޓަލީ ބައިވެރިވާނެ ކަމަށް ބޮޑުވަޒީރު ޖިއޯޖިއާ މެލޯނީ އާދީއްތަ ދުވަހު އިޝާރާތެއް ދެއްވައިފިއެވެ.
އިޓަލީގެ ދުވަހު ނޫސް ކޮރިއެރެ ޑެލާ ސެރާއަށް ދިން އިންޓަވިއުއެއްގައި މެލޯނީ ވިދާޅުވީ އިޓަލީއަށް އޮބްޒާވަރު ސްޓޭޓަސްގައި ބައިވެރިވުމުގެ ދައުވަތު ލިބިފައިވާ ކަމަށާއި ރަނގަޅު ޖަވާބެއް ދޭނެ ކަމަށެވެ.
"އަޅުގަނޑުމެންނަށް ދައުވަތު ދިނީ އޮބްޒާވަރު ގައުމެއްގެ ގޮތުގައި، އަދި އަޅުގަނޑުމެންގެ ނަޒަރުގައި މެދުއިރުމަތީގައި ހިނގަމުންދާ ހަނގުރާމައިގެ މައްސަލަ އާއި ގުޅޭ ގޮތުން އެއީ ރަނގަޅު ހައްލެއް،" މެލޯނީ ވިދާޅުވިއެވެ.
މެލޯނީ ވިދާޅުވީ ޔޫރަޕްގެ ޤައުމުތަކަށް ދައުވަތު ދިނީ ވަރަށް ފަހުން ކަމަށްވާތީ އިޓަލީގެ ރޯލު އަދި މުޅިން ފައިނަލް ނުވާ ކަމަށެވެ.
މެލޯނީ މިހެން ވިދާޅުވީ ޣައްޒާއަށް އަމާޒުކޮށްގެން އީޔޫގެ ބައިވެރިންނާއެކު ބާއްވާ ބައްދަލުވުންތަކުގައި ބައިވެރިވެވަޑައިގަންނަވާ އިޓަލީގެ ފޮރިން މިނިސްޓަރު އެންޓޯނިއޯ ޓަޖާނީއާ ވެސް ޔޫރަޕްގެ ލީޑަރުންނާ މަޝްވަރާ ކުރައްވަމުން ގެންދަވާ ދަނޑިވަޅެއްގައެވެ.
ޖެނުއަރީ 22 ވަނަ ދުވަހު ސްވިޒަލޭންޑްގެ ޑަވޯސްގައި ބޭއްވި ވޯލްޑް އިކޮނޮމިކް ފޯރަމްގެ ހަވާސާގައި ސުލްހައިގެ ބޯޑުގެ ޗާޓަރުގައި 19 ގައުމެއްގެ މަންދޫބުން ވަނީ ސޮއި ކޮށްފައެވެ.
