ބޮޑުތަކުރުފާނު މަގުން އަލަށް ތަރައްގީކުރި ސަރަހައްދު, ރޭ ފަތިހު 5:00 އިން ފެށިގެން ދަތުރުފަތުރަށް ހުޅުވާލައިފި އެވެ.

ބޮޑުތަކުރުފާނު މަގުގައި އަލަށް ތަރައްގީކޮށްފައިވަނީ ޗާންދަނީ މަގުން ފެށިގެން ފާލަންދޮށު ހިނގުމާ ހަމައަށެވެ. މި މަގު އާންމު ދަތުރުފަތުރަށް ހުޅުވާލައިފައިވާއިރު, މި މަގު ވަނީ ދެކޮޅަށް ދުއްވާ މަގެއްގެ ގޮތުގައި ކަނޑައަޅައިފަ އެވެ.

މިކަން ހާމަކޮށް އެކްސްގައި ކުރެއްވި ޕޯސްޓެއްގައި މިނިސްޓަރު އަމީން ވިދާޅުވީ ޗާންދަނީ މަގުން ފެށިގެން ފާލަންދޮށު ހިނގުމާ ހަމައަށް ބޮޑުތަކުރުފާނު މަގުން އަލަށް ތަރައްޤީކޮށް ހުޅުވާލެވޭ ސެގްމަންޓް، ދެކޮޅަށް ދުއްވާ މަގެއްގެ ގޮތުގައި ކަނޑައަޅައި، 2026 ފެބްރުއަރީ 16 ވާ ހޯމަ ދުވަހު ފަތިހު 5:00 އިން ފެށިގެން މަގު ބޭނުންކުރާ ފަރާތްތަކަށާއި ޢާންމު ދަތުރުފަތުރަށް ހުޅުވާލާނެ ކަމަށެވެ.

"ރައީސް ޑރ. މުހައްމަދު މުއިއްޒުގެ ތަސައްވުރާ އެއްގޮތަށް، ހަތަރު ލޭނު ހިމެނޭގޮތައް ތަރައްގީކޮށް މި ގެނެވުނު ބަދަލާއެކު އެ ސަރަހައްދުގައި ދެކޮޅަށް ދުއްވޭނެ އިންތިޒާމު ހަމަޖެހުމުން، ދަތުރުފަތުރަށް ބޮޑު ލުޔެއް ލިބިގެންދާނެ," މިނިސްޓަރު އަމީންގެ ޕޯސްޓުގައިވެ އެވެ.

ބޮޑުތަކުރުފާނު މަގު ތަރައްގީކޮށްފައިވަނީ އުޅަނދު ފަހަރަށާއި ހިނގާބިނގާވެ އުޅޭ ފަރާތްތަކަށް ބޭނުންކުރަން ފަސޭހަވާނެހެން, ހަތަރު ލޭނަކަށް އުޅަނދުތަކަށް ދުއްވޭނެ ގޮތަށެވެ. މިއާއެކު އެ ސަރަހައްދުގެ ޓްރެފިކަށް ދާއިމީ ހައްލެއް ލިބިގެންދާނެ ކަމަށް ސަރުކާރުން ބުނެފައިވެ އެވެ.