އުމުރުން އެންމެ 30 ގެ އަހަރުތަކުގައި މަތިންދާބޯޓު އެކްސިޑެންޓެއްގައި މަރުވި ޖޯން އެފް. ކެނެޑީ ޖޫނިއާ، ކެރޮލިންއާއި ދެމެދު އޮތް ލޯބީގެ ގުޅުމާއި އަދި އެމީހުންގެ ވާހަކަ ތަކަކީ މިއަދާ ހަމައަށް ވެސް ގިނަ ބައެއްގެ ޝައުގުވެރިކަން ހުރި ވަހަކަތަކެކެވެ.

ޖޯން އެފް. ކެނެޑީ ޖޫނިއާ އެންޑް ކެރޮލިން ބެސެޓްގެ އެމަރިކަން ލަވް ސްޓޯރީ އަނެކާވެސް މީޑިއާގެ ސަމާލުކަމަށް އައިސްފި އެވެ. އެމެރިކާގެ އެންމެ ނުފޫޒުގަދަ އަދި ޝާހީ އާއިލާއަކާ އެންމެ އެއްގޮތް އާއިލާއަކީ ކެނެޑީ އާއިލާ ކަމަށްވާނަމަ، އެ އާއިލާއާ ގުޅުނު ކެރޮލިން ބެސެޓް ކެނެޑީއަކީ އެމެރިކާގެ "ޕްރިންސެސް ޑަޔާނާ" އެވެ. އިނގިރޭސިވިލާތުގެ ޝާހީ އާއިލާއަށް ޑަޔާނާ އައި ފަދައިން، ކެރޮލިންއަކީ ވެސް ކެނެޑީ އާއިލާގެ ތެރޭގައި ހިނގާ ސިޔާސީ އަދި އިޖުތިމާއީ ކަސްތޮޅުތަކަށް އައު، ބޭރުން އައި މީހެކެވެ.

އެފް.އެކްސް އިން އަލަށް އުފެއްދި "ލަވް ސްޓޯރީ: ޖޯން އެފް. ކެނެޑީ ޖޫނިއާ އެންޑް ކެރޮލިން ބެސެޓް" އަކީ ރަޔަން މާފީގެ "ރިއަލް-ލައިފް ރޮމޭންސް އެންތޮލޮޖީ" ސީރީޒްގެ ފުރަތަމަ ބައެވެ. ކޮނާ ހައިންސް އުފައްދާފައިވާ މި ސީރީޒަކީ އެލިޒަބަތު ބެލާގެ ފޮތް "ވަންސް އަޕޮން އަ ޓައިމް" ގެ މައްޗަށް ބިނާކޮށް، 20 ވަނަ ގަރުނުގެ އެމެރިކާގެ ތާރީހު އައު ގޮތަކަށް ސިފަކޮށްދޭން ކުރި މަސައްކަތެކެވެ.

މި ސީރީޒްގައި ކެރޮލިން ބެސެޓްގެ ރޯލުން ފެނިގެންދާ ސާރާ ޕިޖަންގެ ހުށަހެޅުން ވަރަށް ފުރިހަމަ އެވެ. ކުރީގެ ބައެއް ވާހަކަތަކުގައި ކެރޮލިންއަކީ "ނުބައި" އަންހެނެއްގެ ގޮތުގައި ސިފަކޮށްފައި އޮތް ނަމަވެސް، މި ސީރީޒުން އޭނާއަކީ ބުއްދިވެރި، ކެރޭ، އަދި އަމިއްލަ ނަފްސުގެ މައްޗަށް ބާރުފޯރުވާ، މި ވާހަކައިގެ މައިގަނޑު ޝަހުސިއްޔަތުގެ ގޮތުގައި ދައްކައިދެ އެވެ. ޖޯން އެފް. ކެނެޑީ ޖޫނިއާގެ ރޯލުން ފެންނަ ޕޯލް އެންތޮނީ ކެލީ ދައްކުވައިދެނީ، އޭނާގެ މަޝްހޫރު ބައްޕައާ އެއްވަރުވުމަށް މަސައްކަތްކުރާ ނަމަވެސް އެކަން ކާމިޔާބު ނުވާ ދަރިއެއްގެ ރޯލެވެ. މީގެ އިތުރުން ނައޯމީ ވަޓްސް، ޖެކްލިން ކެނެޑީ އޮނާސިސްގެ ރޯލުން ފެނިގެންދެ އެވެ.

ނިއުޔޯކް ސިޓީގެ 90 ގެ އަހަރުތަކުގެ މާހައުލާއި، ކެރޮލިންގެ ފުރިހަމަ ސްޓައިލް މި ސީރީޒްގައި ވަރަށް ރީތިކޮށް ދައްކުވައިދީފައިވެ އެވެ. ނަމަވެސް، ޕަޕަރާޒީންގެ އުނދަގުލާއި މީޑިއާގެ ފިއްތުންތަކުގެ ސަބަބުން ކެރޮލިންގެ ނަފްސާނީ ދުޅަހެޔޮކަމަށް ކުރި އަސަރުތައް މި ވާހަކައިން ފެނިގެންދެ އެވެ. މީޑިއާއިން އެއްފަހަރު އޭނާ މަތިވެރިކުރާއިރު، އަނެއްފަހަރު އޭނާގެ އަގު ވައްޓާލުމަކީ އޭނާގެ މިނިވަންކަން ގެއްލިގެން ދިޔަ މައިގަނޑު ސަބަބެވެ.

މި ސީރީޒަކީ އެމެރިކާގެ "ދަ ކްރައުން" އަށް ވުމަށް ކުރާ އުންމީދީ މަސައްކަތެއް ނަމަވެސް، ކެނެޑީ އާއިލާގެ ސިޔާސީ ނުފޫޒާއި އެމެރިކާގެ ރައްޔިތުންނަށް އެ އާއިލާގެ މުހިންމުކަން އެހާ ފުންކޮށް ދިރާސާކޮށްފައި ނުވާކަން ފާހަގަކުރެވެ އެވެ.