ރާއްޖެއަށް ދުވާލެއްގެ މައްޗަށް އެންމެ ގިނަ ފަތުރުވެރިން އައުމުގެ ރެކޯޑް 3 ވަނަ ފަހަރަށް މުގުރާލައިފި

ރެކޯޑް އަދަދަކަށް ތިންވަނަ ފަހަރަށް، ރާއްޖެއަށް ދުވާލަކު އެންމެ ގިނައިން ފަތުރުވެރިން އަތުވެއްޖެ އެވެ.

ރާއްޖެއިން ތިންވަނަ ފަހަރަށް އެ ރެކޯޑް، އިއްޔެ މުގުރާލައިފިކަން ހާމަވީ ޓޫރިޒަމް މިނިސްޓްރީން އިއްޔެ ނެރުން ތަފާތު ހިސާބުތަކުންނެވެ. އެގޮތުން އެމިނިސްޓްރީގެ ތަފާސްހިސާބު ދައްކާގޮތުން އިއްޔެ ރާއްޖެއަށް 11،136 ފަތުރުވެރިން ވަނީ ޒިޔާރާތް ކޮށްފަ އެވެ.

އެންމެ ފަހުން ރާއްޖެއަށް ދުވާލަކު އެންމެ ގިނަ ފަތުރުވެރިން އައުމުގެ ރެކޯޑް ހެދީ މި މަހު އަށް ވަނަ ދުވަހުގަ އެވެ. އެއީ 10،462 ފަތުރުވެރިންނާއި އެކު ހެދި ރެކޯޑެއްކެވެ. އެންމެ ފުރަތަމަ ގާއިމުކުރީ މިމަހުގެ އެއް ވަނަ ދުވަހު އެވެ. އެ ދުވަހު ޒިޔާރާތް ކުރީ 10،253 ފަތުރުވެރިންނެވެ.

މިއަހަރު މިހާތަނަށް ރާއްޖެއަށް ވަނީ 349،990 ފަތުރުވެރިން ޒިޔާރަތް ކޮށްފަ އެވެ. އެގޮތުން ޖެނުއަރީ މަހު ރާއްޖެއަށް ޒިޔާރާތް ކޮށްފައިވަނީ 224,788 ފަތުރުވެރިންނެވެ. އަދި ފެބްރުއަރީ 1 އިން ފެށިގެން ދުވަހުން 14 ވަނަ ދުވަހުގެ ނިޔަލަށް ޒިޔާރާތް ކޮށްފައިވަނީ 125,202 ފަތުރުވެރިންނެވެ.

ރާއްޖެއަށް މިދުވަސްވަރު އެންމެ ގިނައިން ފަތުރުވެރިން ޒިޔާރާތްކުރާ ގައުމުތަކުގެ ތެރޭގައި ހިމެނެނީ ޗައިނާ އާއި، ރަޝިޔާ އާއި ،އިޓަލީގެ އިތުރުން ޔޫކޭ އަދި ޖަރުމަނެވެ. އެގޮތުން އެންމެ ގިނަ ފަތުރުވެރިން އައިސްފައި ވާނީ ޗައިނާއިންނެވެ. ޗައިނާއިން ރާއްޖެއަށް ޒިޔާރަތް ކުރީ 49,704 ފަތުރުވެރިންނެވެ.

އަދުގެ ސަރުކާރުން އަމާޒު ހިފާފައި ވަނީ މި އަހަރުގެ ނިޔަލަށް 2.5 މިލިއަން ފަތުރުވެރިން ރާއްޖެ އަށް ޒިޔާރަތްކުރުމެވެ.