ގިރާވަރު ފަޅު ހިއްކުމުގެ މަސައްކަތް އެއްފަހަރާ ދެޑްރެޖަރާއެކު ހަލުވި ދުވެލީގައި ކުރިއަށްދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާންކުރައްވައިފިއެވެ.

ގިރާވަރު ފަޅު ހިއްކުމުގެ މަސައްކަތަށް ދެޑްރެޖަރު ބޭނުންކުރާކަން ރައީސް ޑރ. މުއިއްޒު އިއުލާންކުރެއްވީ، އެ މަނިކުފާނުގެ އެކްސް އެކައުންޓުގައި ފޮޓޯތަކަކާއެކު ހިއްސާކުރެއްވި ޕޯސްޓެއްގައެވެ. މެދުކެނޑިފައި އޮތް ގިރާވަރު ފަޅު ހިއްކުމުގެ މަޝްރޫއުގެ އަމަލީ މަސައްކަތް އަލުން ފަށާފައި ވަނީ މިދިޔަ ޖެނުއަރީ މަހުގެ 30 ވަނަ ދުވަހުގެ ހެނދުނުގެ ވަގުތެއްގައެވެ.

ގިރާވަރު ފަޅުން ހިއްކުމުގެ މަސައްކަތް ދެޑްރެޖަރު ބޭނުންކޮށްގެން ކުރަމުން އަންނައިރު އެ ސަރަހައްދުން ޖުމްލަ 169 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. ސަރުކާރުން މީގެ ކުރިން ވަނީ 56 ހެކްޓަރުގެ ބިން އެ ސަރަހައްދުން ހިއްކައިފައެވެ. އެހެންކަމުން ގިރާވަރުފަޅުން ދެން ހިއްކަން ޖެހޭނީ 113 ހެކްޓަރުގެ ބިމެކެވެ.

ގިރާވަރު ފަޅު ހިއްކުމުގެ މަސައްކަތް ކުރިއަށްދަނީ--- ފޮޓޯ: ރައީސް މުއިއްޒުގެ އެކްސް އެކައުންޓް

ގިރާވަރުފަޅު ހިއްކުމުގެ މަސައްކަތް ކުރުމަށް ބޭނުންކުރާ އެއްޑްރެޖަރަކީ ހުޅުމާލޭ ތިންވަނަ ފިޔަވަހީގެ ބިން ހިއްކުމުގެ މަސައްކަތަށް ރާއްޖެ އަށް ގެނައި ޓްރެއިލިން ސަކްޝަން ހޮޕާ ޑްރެޖާ އޮރަންޖީއާއެވެ. މި ޑްރެޖަރަކީ ދުނިޔޭގެ އެންމެ ބޮޑެތި ޑްރެޖަރުތަކުގެ ތެރެއިން ޑްރެޖަރަކަށްވާއިރު، މިއީ އެއްފަހަރާ 22,000 ކިއުބިކް މީޓަރުގެ ވެލި ނެގުމުގެ ކެޕޭސިޓީ އޮތް ބޮޑު ޑްރެޖަރެކެވެ.

ހުޅުމާލޭ ތިންވަނަ ފިޔަވައްސެކޭ އެއްފަދައިން ގިރާވަރު ފަޅު ހިއްކުމުގެ މަސައްކަތް ވެސް ކުރިއަށް ގެންދާނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިންނެވެ.