ކުޑަހުވަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީން އިސްނަގައިގެން އެ ރަށުގައި ތަރައްގީކުރި އައު ޖިމް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުހައްމަދު މިއަދު ރަސްމީކޮށް ހުޅުއްވައިދެއްވައިފި އެވެ.
މި ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު އާއި، ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެންބަރު ހުސައިން ހަމީދުގެ އިތުރުން، ރަށު ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއި ރަށުގެ ގިނަ އަދަދެއްގެ ރައްޔިތުން ބައިވެރިވި އެވެ.
ކުޑަހުވަދޫ އެކުވެރި އަންހެނުންގެ ކޮމިޓީގެ އިމާރާތުގައި ގާއިމުކޮށްފައިވާ މި ޖިމް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން، ރައީސުލްޖުމްހޫރިއްޔާގެ އަނބިކަނބަލުން ވަނީ ދުޅަހެޔޮ ސިއްހަތެއްގައި ހުރުމަށާއި، ގައިންގަޔަށް ނާރާ ބަލިތަކުން ރައްކާތެރިވުމަށްޓަކައި ހަށިގަނޑު ހަރަކާތްތެރިކޮށް ބެހެއްޓުމުގެ މުހިންމުކަމުގެ މައްޗަށް ބާރުއަޅުއްވާފަ އެވެ. އަދި ރަށުގައި މިފަދަ ވަސީލަތެއް ގާއިމުވުމަކީ ރައްޔިތުންގެ ދުޅަހެޔޮކަމަށް ލިބުނު ބޮޑު ކުރިއެރުމެއްގެ ގޮތުގައި އެކަމަނާ ސިފަކުރެއްވި އެވެ.
އެކަމަނާގެ ވާހަކަފުޅުގައި، ރައްޔިތުންގެ އާންމު ސިއްހަތު ރައްކާތެރިކުރުމަށް ސަރުކާރުން ދެއްވާ މުހިންމުކަން ފާހަގަކުރެއްވި އެވެ. އެގޮތުން، ސިއްހީ ދާއިރާއިން ރައީސުލްޖުމްހޫރިއްޔާ ގެންގުޅުއްވާ ހަރުދަނާ ސިޔާސަތުތަކުގެ ސަބަބުން، ޓައިމް މަޖައްލާއިން ހޮވި 2026 ވަނަ އަހަރުގެ ސިއްހީ ދާއިރާގެ އެންމެ ނުފޫޒުގަދަ 100 ޝަހްސިއްޔަތުގެ ތެރޭގައި އެމަނިކުފާނު ހިމެނިވަޑައިގެންފައިވާކަން އެކަމަނާ ފާހަގަކުރެއްވި އެވެ. ވަކިން ހާއްސަކޮށް، ދުންފަތުގެ އިސްތިއުމާލުކުރުން ހުއްޓުވުމަށް ރައީސުލްޖުމްހޫރިއްޔާ އިސްނަންގަވައިގެން އަޅުއްވަމުންދާ ހަރުދަނާ ފިޔަވަޅުތަކަށް އެކަމަނާ ތައުރީފުކުރެއްވި އެވެ.
މިއަދު ހުޅުވުނު ޖިމަކީ ބަލިތަކުން ރައްކާތެރިވެފައިވާ މުޖުތަމައެއް ބިނާކުރުމަށް އެޅުނު މުހިންމު ފިޔަވަޅެއްކަމަށް ވިދާޅުވެ، ރަށުގެ ހުރިހާ ފަރާތްތަކުންވެސް މި ތަނުގެ ބޭނުން އެންމެ ފުރިހަމަ ގޮތުގައި ހިފުމަށް އެކަމަނާ އުއްމީދުކުރެއްވި އެވެ. މީގެ އިތުރުން، ކުޑަހުވަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީން ދެއްކެވި މި ނަމޫނާ މަސައްކަތަށްޓަކައި އެ ކޮމިޓީއަށް އެކަމަނާ ޝުކުރު އަދާކުރެއްވި އެވެ.
