ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވާދަކުރާ، ޝަރުތު ހަމަވެފައިވާ ކެންޑިޑޭޓުންގެ ނަންތައް ތަރުތީބު ކުރުމަށްޓަކައި ބާއްވާ ގުރުއަތުލުން މިއަދު ރާއްޖޭގެ ހުރިހާ ރަށެއްގައި ބާއްވައިފި އެވެ.
އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ މި އިންތިހާބުގެ ކެންޑިޑޭޓުންގެ ނަންތައް ތަރުތީބުކުރުމުގެ މަސައްކަތް ކުރިއަށްދިޔައީ މިއަދު ހެނދުނު 10:00 އިން ފެށިގެންނެވެ. މާލެ ސިޓީގެ ކެންޑިޑޭޓުންގެ ނަންތައް ތަރުތީބުކުރުމުގެ ގުރުއަތުލުން ކުރިއަށްދިޔައީ އިންތިހާބާ ބެހޭ މަރުކަޒުގަ އެވެ. އަދި އަތޮޅުތަކުގެ ރަށްތަކާއި ސިޓީތަކުގައި މި މަސައްކަތް ކުރިއަށްދިޔައީ އެ ރަށެއްގެ ކައުންސިލް އިދާރާގައި ނުވަތަ ކައުންސިލުން ކަނޑައަޅާފައިވާ ހާއްސަ ތަންތަނުގަ އެވެ.
މިއަދު ގުރުއަތުލުން ބާއްވާފައި ނުވަނީ ރާއްޖޭގެ އެންމެ ދެ ރަށެއްގަ އެވެ. އެއީ ކޯޓުގައި މައްސަލައެއް ހިނގަމުންދާތީ، ކ. ތުލުސްދޫ އާއި ކ. ގުރައިދޫ އެވެ. މި ދެ ރަށުގެ ކައުންސިލްތަކަށް ވާދަކުރާ ކެންޑިޑޭޓުންގެ ގުރުއަތުލުން މިއަދު ކުރިއަށް ނުގެންދާކަން އިލެކްޝަންސް ކޮމިޝަނުން ވަނީ ފާހަގަކޮށްފަ އެވެ.
މި އިންތިހާބުތަކުގައި ވާދަކުރުމަށް ޖުމްލަ 2,994 ކެންޑިޑޭޓުން ހުށަހެޅި ނަމަވެސް، 32 ކެންޑިޑޭޓަކު ނަން އަނބުރާ ގެންދިއުމާ ގުޅިގެން މިހާރު ވާދަކުރާ ކެންޑިޑޭޓުންގެ އަދަދަކީ 2,962 އެވެ. ނަން ތަރުތީބުކޮށް ނިމުމުން، ކެންޑިޑޭޓުންގެ ދާއިމީ ލިސްޓު އަންނަ ހޮނިހިރު ދުވަހު ރަސްމީކޮށް އިއުލާނުކުރާނެ ކަމަށް އިލެކްޝަންސް ކޮމިޝަނުން ބުންޏެވެ.
މި އިންތިހާބުގައި ރަށު ކައުންސިލްތަކަށް 626 ކައުންސިލަރުން އަދި ސިޓީ ކައުންސިލްތަކަށް 52 ކައުންސިލަރުން އިންތިހާބު ކުރުމަށް ވަނީ ހަމަޖެހިފަ އެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށްވެސް ހަމަ އެ އަދަދަށް މެންބަރުން އިންތިހާބު ކުރެވޭނެ އެވެ.
އިލެކްޝަންސް ކޮމިޝަނުން ބުނި ގޮތުގައި، މިފަހަރުގެ އިންތިހާބުގައި ވޯޓުލުމުގެ ހައްގު ޖުމްލަ 294,937 މީހުންނަށް ލިބިގެންވެ އެވެ.
