އެއްދުވަސްވަރެއްގައި ހޮލީވުޑްގެ އެންމެ މަގުބޫލު ޖޯޑުގެ ގޮތުގައި ފާހަގަކުރެވުނު ޒޭން މާލިކް އާއި ޖީޖީ ހަދީދުއާ ދެމެދު އޮތް ގުޅުމުގައި ހަގީގީ ލޯބި ނެތް ކަމަށް ޒޭން މާލިކް ހާމަކޮށްފި އެވެ.
މަޝްހޫރު ލަވަކިޔުންތެރިޔާ ޒޭން އާއި ސުޕަމޮޑެލް ޖީޖީ ލޯބީގެ ގޮތުން ގުޅުނީ 2015 ވަނަ އަހަރުގެ ފަހުކޮޅުގަ އެވެ. ދޭތެރެއަކުން ގުޅުން ކެނޑި، އަލުން ގުޅެމުން ދިޔަ މި ދެމީހުންގެ ގުޅުން އެއްކޮށް ނިމުމަކަށް އައީ 2021 ވަނަ އަހަރު، ޖީޖީގެ މަންމައާ ޖެހުނު މައްސަލައަކަށްފަހުގަ އެވެ.
އެލެކްސް ކޫޕާގެ "ކޯލް ހާ ޑެޑީ" ޕޮޑްކާސްޓްގައި އިއްޔެ ވާހަކަދައްކަމުން، ވަން ޑައިރެކްޝަންގެ ކުރީގެ މެންބަރު ޒޭން ވަނީ އޭނާގެ އިހުސާސްތައް ހާމަކޮށްފަ އެވެ. ޒޭން ބުނި ގޮތުގައި އޭނާގެ ދަރިފުޅުގެ މަންމައަށް ވީތީ ޖީޖީއަށް އަބަދުވެސް އިހުތިރާމް ކުރާނެ އެވެ. ނަމަވެސް އެއީ ރޮމޭންޓިކް ލޯބި ނުވަތަ "އިން ލަވް" ވެގެން އުޅުނު އުޅުމެއް ކަމަކަށް އޭނާ މިހާރު ގަބޫލެއް ނުކުރެ އެވެ.
"ތެދަށް ބުނާނަމަ، އަދި މިއީ ރެކޯޑް ކުރެވިފައި އޮންނަން ބޭނުންވާ ވާހަކައެއް، އަހަރެން އަބަދުވެސް ޖީޖީ ދެކެ ލޯބިވާނަން. އެއީ އަހަރެންގެ ދަރިފުޅު މި ދުނިޔެއަށް އައުމުގެ ސަބަބަކީ އޭނާ ކަމަށްވާތީ. އެކަމަކު އޭނާދެކެ އަހަރެންވީ 'އިން ލަވް' ކަމެއް އަހަރެންނަކަށް ނޭނގެ،" ޒޭން ބުންޏެވެ.
ޒޭން އިތުރަށް ބުނި ގޮތުގައި އެ ދުވަސްވަރު އޭނާގެ އަމަލުތައް ހުރި ގޮތުންވެސް އެއީ ހަގީގީ ލޯބި ނޫންކަން އެނގެ އެވެ. އޭނާ ބުނި ގޮތުގައި އެއީ ހަގީގީ ލޯބި ކަމަށްވާނަމަ، އޭނާ އެއަށްވުރެ ރަނގަޅު މީހަކަށް ވީސް ކަމަށެވެ. ލޯތްބާ މެދު އޭނާގެ ވިސްނުން ބަދަލުވަމުންދާކަން ފާހަގަކުރަމުން ޒޭން ބުނީ، މާޒީގައި އެއީ ލޯބި ކަމަށް ހީވިޔަސް، ބޮޑުވެ ހޭލުންތެރިވުމުން އެއީ އެދުންވެރިކަން ނުވަތަ އެހެން ކަމެއްކަން މިހާރު އިހުސާސްވާ ކަމަށެވެ.
އެގޮތުން، ޒޭން އާއި ޖީޖީގެ ފަސް އަހަރުގެ އަންހެން ދަރިފުޅު "ކައި" ބަލައި ބޮޑުކުރުމުގެ ޒިންމާ، އެ ދެފަރާތުން މިހާރު އުފުލަމުންދަނީ ގުޅިގެން ކޯ-ޕޭރެންޓިންގް އުސޫލުންކަަމަށް ވެސް ޒޭން ފާހަގަކުރި އެވެ.
ޖީޖީއާ ގުޅުމުގެ ކުރިން ޒޭން ވަނީ "ލިޓްލް މިކްސް" ގެ ލަވަކިޔުންތެރިޔާ ޕެރީ އެޑްވާޑްސްއާ އެންގޭޖްވެސް ވެފަ އެވެ. އަދި ޖީޖީ މިހާރު އަންނަނީ 2023 ވަނަ އަހަރުން ފެށިގެން މަޝްހޫރު އެކްޓަރު ބްރެޑްލީ ކޫޕާއާ އެކު ލޯބީގެ ގޮތުން ގުޅިގެން އުޅެމުންނެވެ.
