ހޮލީވުޑްގެ މަޝްހޫރު އެކްޓަރު ބްރެޑް ޕިޓް މުހިންމު ރޯލަކުން ފެނިގެންދިޔަ ކާމިޔާބު ފިލްމު "އެފް1" ގެ ދެވަނަ ބައެއް ނުވަތަ ސީކުއަލްއެއް އުފެއްދުމުގެ ރަސްމީ މަސައްކަތް ފަށާފައިވާކަން އެ ފިލްމުގެ ޕްރޮޑިއުސަރު ޖެރީ ބްރަކްހައިމާ ކަށަވަރުކޮށްދީފި އެވެ.
ޖެރީ ބްރަކްހައިމާ ބުނީ، މި ފިލްމުގެ ސީކުއަލްއެއްގެ މަސައްކަތް މިހާރު ކުރިއަށްދާ ކަމަށެވެ. މީގެ ކުރިން ބޭއްވި އެޕަލް ޓީވީގެ ޕްރެސް ޑޭގައި މިކަން ރަސްމީކޮށް ކަށަވަރުކޮށް ދީފައި ނުވި ނަމަވެސް، ބްރަކްހައިމާ މިހާރު ވަނީ މި މަޝްރޫއު ކުރިއަށްދާކަން ޔަގީންކޮށްދީފަ އެވެ.
ފޯމިއުލާ ވަންގެ ހަތް ފަހަރުގެ ޗެމްޕިއަން ލުވިސް ހެމިލްޓަން ކޯ-ޕްރޮޑިއުސްކޮށްފައިވާ "އެފް1" އަކީ މިއަހަރުގެ އޮސްކާ އެވޯޑްސްގެ އެންމެ މޮޅު ފިލްމުގެ ކެޓަގަރީ ހިމެނޭހެން ޖުމްލަ ހަތަރު ދާއިރާއަކުން ނޮމިނޭޓްވެފައިވާ ފިލްމެކެވެ. އުމުރުން 62 އަހަރުގެ ބްރެޑް ޕިޓް މި ފިލްމުގައި ކުޅެފައިވަނީ، ދިގު މުއްދަތެއްގެ މެދުކެނޑުމަކަށްފަހު އަލުން "އޭޕީއެކްޖީޕީ" ކިޔާ ހިޔާލީ ޓީމަކާއެކު ރޭސިންގް މައިދާނަށް ނުކުންނަ ތަޖުރިބާކާރު ޑްރައިވަރު، ސަނީ ހޭސްގެ ރޯލެވެ.
Advertisement
މި ފިލްމުގެ ދެވަނަ ބައި ނިމޭނެ ތާރީހެއް ނުވަތަ ކާސްޓުންގެ ތަފްސީލެއް ބްރަކްހައިމާ އަދި ހާމައެއް ނުކުރެއެވެ. ބްރެޑް ޕިޓް އެނބުރި އަންނާނެކަން ސީދާ ކަށަވަރުކޮށް ނުދިން ނަމަވެސް، ފިލްމުގެ ކާސްޓުން ކަނޑައެޅުމުގައި އޭނާގެ ފުރިހަމަ ބައިވެރިވުން އޮންނާނެ ކަމަށް ޕްރޮޑިއުސަރު ބުންޏެވެ.
މިދިޔަ އަހަރުގެ ހޫނު މޫސުމުގައި ރިލީޒްކުރި "އެފް1" އަކީ އެޕަލް އޮރިޖިނަލް ފިލްމްސްގެ މިހާތަނަށް އެންމެ ކާމިޔާބު އުފެއްދުމެވެ. މި ފިލްމަށް ބޮކްސް އޮފީހުގައި 630 މިލިއަން ޑޮލަރުގެ އާމްދަނީއެއް ލިބިފައިވާއިރު، ފިލްމުގެ ގިނަ މަންޒަރުތަކެއް ނަގާފައިވަނީ 2023 އަދި 2024 ވަނަ އަހަރުގެ ފޯމިއުލާ ވަން ސީޒަންގެ ތެރެއިން، ސިލްވަސްޓޯން ފަދަ މަޝްހޫރު ރޭސް ޓްރެކްތަކުގަ އެވެ.
ފިލްމަށް ލިބުނު އެވޯޑް ނޮމިނޭޝަންތަކާ މެދު ހިތްހަމަޖެހުން ފާޅުކުރަމުން ބްރަކްހައިމާ ބުނީ، ބްރެޑް ޕިޓާއެކު މަސައްކަތް ކުރުމަކީ ލިބުނު ވަރަށް ބޮޑު އުފަލެއް ކަމަށެވެ. އަދި ފިލްމު އުފެއްދުމުގައި ދިމާވި ގޮންޖެހުންތަކަށްފަހު، ބެލުންތެރިންނަށް ކަމުދާ ފަދަ އުފެއްދުމެއް ނެރެވުމަކީ ލިބުނު ބޮޑު ކާމިޔާބީއެއް ކަމަށް އޭނާ ފާހަގަކުރި އެވެ.
މީގެ އިތުރުން، ބްރަކްހައިމާ ދަނީ "ހީޓް 2" އާއި، 1990 ގެ އަހަރުތަކުގައި ޓޮމް ކްރޫޒް ފެނިގެންދިޔަ "ޑޭސް އޮފް ތަންޑާ" ގެ އާ ފިލްމެއްގެ މަސައްކަތް ވެސް ރާވަމުންނެވެ. އަދި "ޓޮޕް ގަން" ގެ އާ ފިލްމަކާއި "ޕައިރޭޓްސް އޮފް ދަ ކެރީބިއަން" ފްރެންޗައިޒްގެ އާ ފިލްމެއްގެ އިތުރުން، ޔޫއެފްއޯ އާ ގުޅޭ ތަފާތު މަޝްރޫއެއްގެ މަސައްކަތް ވެސް ކުރިއަށްދާ ކަމަށް އޭނާ ވަނީ ހާމަކޮށްފަ އެވެ.
