ރަސްމާލޭ ބިންހިއްކުމުގެ މަޝްރޫއުގެ ދަށުން މިހާތަނަށް ސައިޓް އޭއިން 116 ހެކްޓަރުގެ ބިން ހިއްކައި ނިމިފައިވާ ކަމަށް މި މަސައްކަތް ކުރިއަށްގެންދާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފި އެވެ.
އެމްއޭސީއެލްއިން މީޑިއާތަކަށް ފޮނުވި މެސެޖެއްގައި ބުނީ، ރަސްމާލޭ ސައިޓް އޭގައި ހިއްކުމަށް ހަމަޖެހިފައިވާ 137.5 ހެކްޓަރުގެ ތެރެއިން މިހާތަނަށް 116 ހެކްޓަރުގެ ބިން ހިއްކައި ނިމިފައިވާ ކަމަށެވެ. މިއީ މަޝްރޫއުގެ 84.36 އިންސައްތަ މަސައްކަތް ކަމަށާއި، މި މަޝްރޫއުގެ މަސައްކަތް ކުރިއަށް ދަނީ ތާވަލާ އެއްގޮތަށް ކަމަށް އެ ކުންފުނިން ވަނީ ހާމަކޮށްފަ އެވެ.
ރަސްމާލޭ ސައިޓް އޭ ގައި ބިން ހިއްކުމުގެ މަސައްކަތް ކުރިއަށް ގެންދަނީ ދުނިޔޭގެ އެންމެ ބޮޑު އެއް ޓްރެއިލާ ސަކްޝަން ހޮޕާ ޑްރެޖަރުގެ ތެރޭގައި ހިމެނޭ، 46,000 ކިއުބިކް މީޓަރުގެ ކެޕޭސިޓީގެ 'ކްރިސްޓޯބަލް ކޮލޯން' ބޭނުންކޮށްގެންނެވެ. މި ޑްރެޖަރު އޮޕަރޭޓް ކުރަނީ "ޖޭން ޑެ ނަލް" ނަމަކަށް ކިޔާ ކުންފުންޏަކުންނެވެ.
ދުނިޔޭގެ އެންމެ ފުރުތަމަ އިކޯ ސިޓީގެ ގޮތުގައި ތަރައްގީކުރާ ރަސްމާލެ ހިއްކައި ނިމުމާއެކު މާލޭ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ލިބިގެންދާނެ ކަމަށް ސަރުކާރުން ގަބޫލުކުރެ އެވެ. މި މަޝްރޫއުގެ ދަށުން އަމިއްލަ ބޯހިޔާވަހިކަމެއް ނެތް ފަރާތްތަކަށް ގޯއްޗާއި ފްލެޓް ހަމަޖައްސަވައިދެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ.
ރަސްމާލެ ހިއްކުމުގެ މަޝްރޫއުގެ އިތުރުން އެމްއޭސީއެލްއިން އަންނަނީ ގިރާވަރު ފަޅު ހިއްކުމުގެ މަސައްކަތް ވެސް ކުރަމުންނެވެ. ރަސްމާލޭ ސައިޓް އޭ ހިއްކުމުގެ މަސައްކަތް އެމްއޭސީއެލްއިން ރަސްމީކޮށް ފަށާފައިވަނީ 1 ޑިސެމްބަރު 2025 ވަނަ ދުވަހު އެވެ.
