ދުނިޔޭގެ އެންމެ ބޮޑު ޑިމޮކްރަސީ ކަމަށްވާ އިންޑިއާ އިން ސޯޝަލްމީޑިއާ ވަރަށް ބޮޑަށް ހަނިކޮށްފިއެވެ. އެ ގައުމުގެ ސަރުކާރުން ސޯޝަލް އިންފޮމޭޝަން ޓެކްނޮލޮޖީ (އިންޓަމިޑިއަރީ ގައިޑްލައިންސް އަދި ޑިޖިޓަލް މީޑިއާ އެތިކްސް ކޯޑް) ގެ ގަވާއިދަށް އިސްލާހު ގެނެސް، ގަވާއިދާ ހިލާފު ކޮންޓެންޓް ނައްތާލުމަށް ސޯޝަލް މީޑިއާ ޕްލެޓްފޯމްތަކަށް ދޭ ވަގުތު ވެސް 36 ގަޑިއިރުން އެންމެ ތިން ގަޑިއިރަށް ވަނީ ކުޑަ ކޮށްފައެވެ.
އާ އޮނިގަނޑުގެ ދަށުން މެޓާ (ފޭސްބުކް، އިންސްޓަގްރާމް)، ޔޫޓިއުބް، އަދި އެކްސް ފަދަ ޕްލެޓްފޯމްތަކުގައި ހުންނަ ކޮންޓެންޓުތައް ނަގަން ކަމާބެހޭ ފަރާތްތަކުން ގާނޫނީ އަމުރެއް ނެރެފި ނަމަ އެ އެއްޗެއް ނައްތާލުމާއި، އަދި އިންޑިއާގެ ގާނޫނުގެ ދަށުން ގާނޫނާ ހިލާފު ކަމަށް ބެލެވޭ ކޮންޓެންޓެއް ނަމަވެސް އެ އެއްޗެއް ވެސް ނައްތާލަން ޖެހެއެވެ.
މި ގޮތަށް އިންޑިއާ އިން ނިންމީ ގައުމީ ސަލާމަތް ރައްކާތެރިކޮށް، ދޮގު މައުލޫމާތު ފެތުރުން ހުއްޓުވުމަށް ކަމަށް އެ ޤައުމުން ބުނެއެވެ.
އިންޑިއާއިން ވަނީ މިދިޔަ އަހަރުގެ ފުރަތަމަ ކުއާޓަރުގައި އެކަނި ވެސް ސަރުކާރުން އަންގައިގެން 28،000 އަށް ވުރެ ގިނަ ކޮންޓެންޓް ޑިލީޓް ކޮށްފައެވެ.
