ރާއްޖޭގައި 16 އަހަރުން ދަށުގެ ކުޑަކުދިންނަށް ސޯޝަލް މީޑިއާ މަނާކުރާ ޕެޓިޝަނެއް ރައްޔިތުންގެ މަޖިލީހަށް ހުށަހަޅަން ސޮއިކުރަން ފަށައިފިއެވެ.

މި ޕެޓިޝަން ހުށަހަޅާފައިވަނީ ރައްޔިތުންގެ މަޖިލީހުން އަލަށް ތައާރަފުކުރި އީ ޕެޓިޝަން ޕޯޓަލް މެދުވެރިކޮށެވެ. ޕެޓިޝަން ހުށަހަޅައިފައިވަނީ އަލީ އާނިމް މުފީދު, އަތަމާވިލާ, ސ.ހިސަދޫ އެވެ.

މި ޕެޓިޝަންގައި, ސޯޝަލްމީޑިޔާ (ފޭސްބުކް, ޓްވިޓާ), ބޮޑެތި މީހުނަށް ހަދާފައި ހުންނަ ވީޑިޔޯ ޕްލެޓްފޯމްތައް(ޔޫޓީއުބް, ޓިކްޓޮކް) އަދި ބައެއް ނޫސްތަކާއި އެނޮނިމަސް ނުވަތަ ކާކުކަން ނޭގޭނޭހެން ޕޯސްޓްކޮށް ހެދޭނެ ވެބްސައިޓްތަކަށް 16 އަހަރުން ދަށުގެ ކުޑަ ކުދިންނަށް ނުވަދެވޭނޭހެން ގާނޫނު އިސްލާހު ކޮށް, ޕްލެޓްފޯމް ތަކަށް މިގާނޫނުގައި އެކުލަވާލުން ހިމަނާފައިވެއެވެ.

ޕެޓިޝަންގެ ހުލާސާ:

1. ސޯޝަލްމީޑިޔާގެ ވަސީލަތްތަކަށް ވަނުން މަނާ އުމުރުގެ ކުޑަ ކުދިން މި ގަވައިދު ނުވަތަ ގާނޫނު ހެދުމަށް ފަހު އެކަން ކުރާނަމަ, އެކަން އެނގޭހިސާބުން އެކުދިންނާއި, އެކުދިންގެ ބެލެނިވެރިންނަށް ކައުންސެލިން ނުވަތަ ނަސޭހަތްތެރިވުން.
2. ތަކުރާރުކޮށް ކުޑަ ކުއްޖަކު ސޯޝަލް މީޑިޔާއައް ވަދެ އުޅޭނަމަ ޖެންޑާ މިނިސްޓްރީއަށް ހާއްސަ ބާރުތަކެއް ދީ ވަކި އުސޫލުތަކެއްގެ މަތިން ކުއްޖާ އާއި ބެލެނިވެރިޔާގެ މައްސަލަ ބެލެވޭނެ ނިޒާމެއް ގާއިމް ކުރުން.
3. ސްކޫލްތަކާއި ކޮލެޖުތަކުގައި މޯބައިލް ފޯނު ނުވެއްދޭހެން ގަވައިދެއް ހަދައި ފާސްކޮށް، އެއަށް އަމަލުކުރަން ފެށުން.

މިފަދަ ސޯޝަލް މީޑިއާ ބޭން އެއް އެންމެ ފުރަތަމަ ކަނޑައެޅީ މިދިޔަ އަހަރުގެ ޑިސެންބަރު މަހުގެ ތެރޭގައި އޮސްޓްރޭލިއާގަ އެވެ. އެއަށްފަހު ފްރާސް އިން ވެސް ވަނީ މި ނިންމުމަށް ތާއީދުކޮށް, ސޯޝަލް މީޑިއާ ބޭން އެއް ކަނޑައަޅައިފައެވެ.