އަހަރުގެ މިހާތަަނަށް ރާއްޖެއަށް 3 ލައްކައަށް ވުރެ ގިނަ ފަތުރުވެރިން ޒިޔާރަތްކޮށްފި އެވެ.

ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާގޮތުން މި އަހަރުގެ ޖެނުއަރީ މަހު އެކަނި ވެސް 224,788 ފަތުރުވެރިން ރާއްޖެ އައިސްފައިވެ އެވެ. އަދި ފެބުރުއަރީ މަހުގެ ފުރަތަމަ ނުވަ ދުވަހުގެ ތެރޭގައި 78,700 ފަތުރުވެރިން ވަނީ ރާއްޖެއަށް ޒިޔާރަތްކޮށްފަ އެވެ.

އެންމެ ގިނައިން ފަތުރުވެރިން އައި ގައުމަކީ ރަޝިޔާ އެވެ. ރަޝިޔާއިން ރާއްޖެ އައި ފަތުރުވެރިންގެ އަދަދަކީ 36,441 ފަތުރުވެރިންނެވެ. އޭގެ އިތުރުން ދެން އެންމެ ގިނައިން ފަތުރުވެރިން ރާއްޖެ އައި ގައުމުތަކުގެ ތެރޭގައި އިޓަލީ، ޗައިނާ އިނގިރޭސި ވިލާތް، އަދި ޖަރުމަނުވިލާތް ހިމެނެ އެވެ.

ރަޝިޔާ: 36,441 ފަތުރުވެރިން

އިޓަލީ: 30,344 ފަތުރުވެރިން

ޗައިނާ: 28,140 ފަތުރުވެރިން

ޔޫކޭ: 25,607 ފަތުރުވެރިން

ޖަރުމަނުވިލާތް: 21,791 ފަތުރުވެރިން

ޓޫރިޒަމް މިނިސްޓްރީން ބުނީ މި މުއްދަތުގައި ފަތުރުވެރިން އެންމެ ގިނައިން ޗުއްޓީ ހޭދަކޮށްފައި ވަނީ ރާއްޖޭގެ ރިސޯޓުތަކުގައި ކަމަށެވެ.

ރިސޯޓުތަކުގައި ޗުއްޓީ ހޭދަ ކޮށްފައި ވަނީ 206,405 ފަތުރުވެރިންނެވެ. އަދި ގެސްޓްހައުސްތަކުގައި ޗުއްޓީ ހޭދަކޮށްފައިވަނީ 82,098 ފަތުރުވެރިންނެވެ. އޭގެ އިތުރުން ހޮޓާ އަދި ސަފާރީ އުޅަނދުގައި ޗުއްޓީ ހޭދަ ކޮށްފައި ވަނީ ޖުމްލަ 14،692 ފަތުރުވެރިންނެވެ. އެއީ ހޮޓާތަކުގައި ޗުއްޓީ ހޭދަ ކުރި 8,305 ފަތުރުވެރިންނާއި ސަފާރީ އުޅަނދު ޗުއްޓީ ހޭދަ ކުރި 6,387 ފަތުރުވެރިންނެވެ.

ހަމަ އެހެންމެ މި ފެބުރުއަރީ މަހުގެ ތެރޭގައި އެންމެ ގިނަ ފަތުރުވެރިން ރާއްޖެއަށް އައިސްފައި ވަނީ މި މަހުގެ އަށް ވަނަ ދުވަހު އެވެ. އެ ދުވަހު ރާއްޖެ އައީ 10,462 ފަތުރުވެރިންނެވެ.